Azərboyconi diasporon vədə nuə vəzifon noə bən

Azərboyconi Zənqilon səhərədə 64 keşfəri 120-kəsiku vey diaspora civonon qırd bən.

Qırdemoni rəsmi mesaj joğo bə: şımə Azərboyconi mıvəfəğətiyon mıdafiə kardəniyon, bə “ğərəzinə kampaniyon ” cəvob doəniyon.Berlində bə İlham Əliyevi “diktator!” vote fonəda qılı co sual bə miyon beşedə – devlət mıstəğıl fikinə vətəndoron ya rəsmi narrativi xaricədə ziyod kardə “məlumat əsqəron” perosnidə?Bə Diaspor Koy ro Devlət Komitə sərdor Fuad Muradovi və əlidə rəsmi xonəxon qəpon nəzə səğandiədə mənzərə həniən pragmatik vində bedə: devlət xaricədə jiyə cıvonon bənə bə “vətənə band” vətəndori ne, bənə informasiya mıharibə aktiv iştirokəkə perosne eçınış qətə.Fuad Muradovi oşko votəşe ki, cıvonon bə “ğərəzinə kampaniyon əsosinə cəvob doe zuədə bənin. Əvon ıştə jimon kardə keşfəron beynəlxalq platformonədə və icmonədə Azərboyconi marağon barz təmsil kardəninin.Həniən sərt mesaj əve ki, xaricədə kamən bıbo Azərboyconi tənğıd və ıştəni bənə azərboyconovoji təğdım kardə odəmon hıstin. Cıvononku ın odəmon zınəni, bə çəvon iddion de arqumenton cəvob doe tələb bedə. Heydər Əliyev Fondi nımoyəndə Elvin Aslanovi bə qiyış qətə ki, xaricədə Azərboyconi mıdafiə karde “hiçənç hoson ni” – de dıcurə standarton və dezinformasiya mıbarizə barde vocibe. De eksperton fiki, məsələ hiçən vətənpərvərətiku ne, sisteminə formadə “məlumot əsqəron” – yəni rəsmi narrativi sosial şəbəkonədə, şərhonədə və beynəlxalq mulağatonədə mıdafiə kardə cıvonə kadron perosneku sıxan şedə. Yəni, devləti nəzorətədə bə “namə zu” ləşkəri soxte eçın qətə bedə.