Diy əhali məşğuləti proqrami ətrofədə mərəşulə

Divojon de koy məşğul karde ro Əliyevi hokumət qıley sosialə layihə bə jimon dəvunidə. Dəvardə sori bımi ro 35 milyon mənot vəsaitən co kardəşe. Isət ım proyekti bərbad vəziyyətədə icra məmləkəti mass-mediadə bə qıley mərəşulə səbəb bıə.

“Faktxəbər.com” Cəlilabad rayoni Məşğuləti Mərkəzi direktor və sər məsləhətçi de Korrupsiya Mubarizə İdarə həmkaron tərəfo dəstqir karde həxədə Respublika Sər prokuratura Mətbuatə xidməti pevolo kardə məlumat bə əhandon nəzə rosniəşe. Əvon çe divojonku kulli miğdarədə rışvə seədə ittiham bedən. Çimi bə navən KİV-on Əhali Sosial Mudafiə Vəzarəti tərəfo bə jimon dəvuniə ım layihə icraəkon divojon bə dast dənoe, bəvon noxəşinə və siənə heyvonon bə bohoə ğıymət epışte barədə nıvıştəşonbe.

İğtisadşunas ekspert Ğubad İbadoğlu bə “Azadlıq.info” sayti votəşe ki, Hokuməti ım layihə çe 4 qılə şirkəti tərəfo icra bedə və devlətə budcəku bımi ro co bıə 35 milyon mənot pul çəvon arədə baxş bıə. İsət çə şirkətonədə 2 qılə  divojon bə dast dənoedə, dələdızdə əmələdə ittiham bedə. Marağinə cəhətən ıme ki, anədə devlətə vəsaiti məsrəf kardə ım şirkəton hic qılə ıştə sayt soxtəşon ni ki, əhali çəvon ım vəsaiti bə kom məğsədon xarc karde barədə səhihə məlumat bə dast varde bızıno.

Im məsələ cəmiyyətədə anədə rezonans bə əməl vardəşe ki, MM-i Sosial Siyasət Komitədə bə muzakirə hədəf bıə. Deputat Araz Əlizadə bı məsələdə Əhali Sosial Mudafiə vəzir Sahil Babayev tənğid kardəşe.

Əmo ım vəzarəti de ictimaiyyəti əlağə şebə mudiri çey tənğidon təkzib kardəşe, votəşe ki, hokuməti əhali məşğul kardə proqram de muvəffəğiyyəti dəvom kardedə. Imsor 5500 ailə ıştə hırdə biznesə təsərrufat onoəşe, və hiç qıley problemşon ni. Bə divojon 29 həzo sə mol-mələ doə bıə. Çəvon 119 qıləku şikat kardəşone ki, ımən cəmi 0,4% təşkil kardedə. Im layihə icra Vəzarəti nəzarəti jitono de muvəffəğiyyəti  bə jimon dəvuniə bedə.