Çominə pencsorə proqram

AZƏRTAC-i xəbə doşe ki, yanvari 29-ədə Prezident İlham Əliyevi bə 2014-2018-minə soron yekunon dair konfransədə ım davardə 5 sorədə məmləkəti har sahədə bə yolə inkişafi nail bıe ğeyd kardəşe. Bımi ro 24 milyard 200 milyon mənot vəsait məsrəf bıə.

Ey vəomə 2019—2023-minə soronədən jıqo nailiyyəton  bə dast varde ro xeyli sosial və infrastruktur layihon icra karde barədə qəp jəşe. Votəşe ki, bımi ro təğribən 17 milyard mənot vəsait xarc karde nəzərədə qətə bedə. Əliyevi bı barədə qıley fərmanən doşe. Əyo ğeyd kardışe ki, dəvardə 15 sorədə, yəni 2004-2018-minə soronədə umumdaxili məhsul 3,3 kərə ziyod bıə, 2milyon koə vırə oj kardə bıə, 100 həzo tojə muəssisə soxtə bıə, bekorəti və beçizəti bə 5% eqınə. Maaşon 7 ğat, pensiyon isə 9 ğat ziyod bıə.

Əmo təhlilqəron prezidenti ım votəyon təkzib kardedən. Məsələn, “Azadlıq.info” nişon dodə ki, 2008-minə sori Respublikadə miyonə manqə məvacib 362 dollar, 2018-minə sori isə 318  dollar , yəni 44 dollar kam bıə. Jıqo vəziyyət həmən de minimum manqə məvacibi və pension məbləğədən muşahidə bedə. Isət məmləkətədə minimum məvacib cəmi 129 mənot, de dollari nisbətədə isə 76 dollare. Əliyevi hokumət 15 sorədə əqər bə anədə inkişafi nail bıəbu, bəs çoko bedə ki, məvacib və pension məbləğədə çe hamsuə Qurçiston və Ermənistonisən bə dumo mandedə?

Təhlilqər Vahid Məhərrəmli fikirən eynən jıqoe. Ey votəşe ki, 2014-2018-minə soron proqram tamamən de iflasi orəxe, mənoti bə dollari nisbətədə 2 kərə , sıftə 49, çəyo 48% -inə devalvasiya , umumən isə bı 5 sorədə 216% erjon bıe, de ımi paralel ərzaği ğıyməton xeyli boho bıe əhali quzəran bə qonə vəziyyət eğandışe. Jıqo vəziyyəti muvəffəğiyyətin hisob karde hiç curə mumkun nı.