Azərbaycan Respublika cumə nımojonədə siyasi xutbəon bəpe handə bıbu.
Azərbaycan Respublika dini qrupon koonədə dıvlətiyə kamissiya rəis cumə nımoji xətibonku tələbış karde ki nımoji xutbəonədə çı dıvləti siyasəton tədğiğ bıkən.
Bə İrirb raporti əsos Mubariz Ğurbanli Ğəfğaz mısılmonə ruhanion idarədə votışe: ruhanion bəpe kişvəri siyasi vəzyət iyən ətrofədə bıə məsələon barədə reaksiya nışo bıdən.
Azərbaycan Respublika dini qrupon koonədə dıvlətiyə kamissiya rəis əlovəş karde: kali cumə nımoji xətibon kişvərədə siyasi vəzyəti barədə sohbət kardeku tarsədən əmmo əvon bəpe bənə co islami kişvəronədə bıə ruhanion siyasi mıvzoon barədə ıştə nəzəri elan bıkən.
Ğurbanli islam dini zuhur karde faxtiku bə siyasi mıvzoon diğğət fakton işorəş karde iyən votışe: hidayət iyən hərəbaxti roon bə cıvonon nışo doe sahədə bə ruhanion rol bəpe diğğət bıbu.
Im sıxənon və tələb qıləy şərayetədəy ki çandə ruhanion ıştə nıtğədə kişvəri siyasi vəzyəti barədə suhbət karde xoto dəstqir və həbs bıən.
Tojədən ım kamissiya ijən elanış karde ki ome təhsil soriku Multikulturalizmi barədə tojə kitob Azərbaycan Respublika məktəbxonəonədə dərs doə bəbe.
Im kitob 2 baxşış heste ki çəy i baxş dinon, dini prinsipon iyən milli-mənəvi erjon barədəy.
Jığo işorə bıə ki de jimoni məhorət kitobi həm bə şoqirdon dini mətləbon omote bəbe.
