Yekaterinburq proseson dəvom

Im sori iyuni 27-də RF Yekaterinburq şəhərədə huğuğ mıhafizə orqanon bə azərboyconovojonku onoə cinoyət dastə vəynə bardə əməliyoti nəticədə 2 xonəxo marde, xeyli xonəxonən dastqir karde bədiqə azərboycon-rusiyə mınasibəton bə həniən tində nuə mərhələ ovaştə.

Azərboyconi tərəfi bımi cəvobədə çe Rusiya "Sputnik Azərboycon" rədio 2 koəkə və Bokuədə 8 kəs urus de fiziki zu tətbiği dastqir kardışe, bo əvon bo sıftənə tədğiği ro 4 manq ko bırnıyəşe. Azərboconi tərəf radio koəkon de Rusiya xısusi xıdmət orqanon koədə, 8 kəsiən çe ironiku narkotrafikədə, kibercinoyətədə ittihon kardedə, diyə məkə ki, azərboyconi hışqə ro sərhədon çandi-çand sore dəbastə bə.

Yekaterinburqədə iyuli sıftədə Azərboycon icmo rəhbər de ıştə zoə bə ico qətə bıbonən. hojo bəvədən 2-3 saati bədiqə vadoə bəbe, ımən bə yolə ictimoi noroziəti səbəb bə be. In koon iyuli 15-də ıştə dəvom seşone. Bə huğuğ mıhafizə orqani koəkə xəsorət rosneədə ittihom bə icmo rəhbəri zoə Mutvəli Şıxlinski iyuli 15-də qətə be və ruji bədiqə əv bo sıftənə tədğiğati ro 2 manq dastqir kardə bə. İcmo rəhbər Şahin Şıxlinski vəynə cinoyət ko ros kardə bə. Çəy huğuğ mıhafizə orqanonku Azərboyconi Moskovadə bə səforətəti mehmonxonədə niyo be xəbə doə bedə. Çın xonəxo tolışə ictimoi xodim Zahirəddin İbrahimi dızdiyədə dast be ehtimol kardə bedə.