İron və Ermənistoni miyono iğtisodi əloğəon.

İron və Ermənistoni prezidenton bə 2 tərəfi iyən reqiyonal iğtisodi əloğəon xususi 2 qılə kişvəri ğeyri dıvləti təşkilaton miyono təkid kardışone.

Bə İrib raporti əsos Həsən Ruhani Ermənistoni prezidentəti vindemonədə bə İron-Ermənistoni miyono bıə dustanə əloğəon işorə və təkidış karde: de hamsoyə kişvəron əcumlə Erməniston əloğəon vey karde İroni xarıci siyasəti prinsiponku iborəte.

Həsən Ruhani 2 qılə milləti miyono bıə tarixi və mədəni mıştərikə noğtəon bo həmmə tərəfinə əloğəonro zəminə hisobış karde və votışe: İron və Erməniston muxtəlif sahəonədə xusosi enerji, tranzit, nəğliyot, turizm və sənayeədə vey zərfiyətışone.

Əv bə mıştərikə sərmoyəon iyən ğeyri dıvləti baxşonədə əloğəon işorə və təsdiğış  karde: xidməton, texnoloqiya iyən muhəndesi baxşonədə İron ıştə təcrubəon bə Erməniston ovıştoniyə bəzne.

İroni prezident Avrasiya iğtisodi çərçivədə həmkarion əhəmiyyətin vəsfış karde və votışe: Avrasiya i bemoni məntəğə ədə İroni iştirok karde bəzne bo iğtisodi həmkarion inkişofiro vey mınosibə fırsət bıbu.

Ermənistoni prezident Armen Serkisiyan həm ım vindemonədə bə Ermənistoni siyasətonədə İroni muhimmə vırə işorə və təkidış karde: Erməniston muxtəlif baxşon xusosi enerji, sənaye, ekoloqiya iyən iğtisodi baxşonədə de İron həmkarion inkişof doe fikədəy.

Əv votışe: Avrasiya iğtisodi həmkarion çərçivədə bəpe de ozodə məntəğəon icod karde zərfiyətoku istifodə bıbu.

Həsən Ruhani de ali heyəti bə i co Ermənistonədə bıə Avrasiya iğtisodi itifoği iclosədə iştirok karde xoto bə İrəvan səfərış karde; xəbə ome zinə İron və Ermənistoni  heyəton həm muxtəlif mıştərikə mıvzoon barədə icloson bərpoşon karde.