İron, Ukrayna sərnişinə təyyarə suğuti barədə iddiaon rəddış karde.

İroni xarıci vəzarətxonə sıxənəvot, Tehronədə Ukrayna sərnişin təyyarə bə zəmin eqniye barədə bəyon bıə iddiaon rəddış karde və votışe: ım hadisə barədə təhğiğon dəvom kardedə.

Əbbas Musəvi ım hadisə barədə Amerkə və Avropa bəzi kişvəron tərəfo bəyon bıə iddiaon be əsos zınəş be və təkidış karde ki: Ukrayna və Amerkəku dəvət bıə ki İroni təhğiğonədə iştirok kon boçi ki İron harcurnə koşınasiyə koməkonku xoşhal bəbe.

Tojədən İroni Avyasiya təşkilati rəis təkidış karde ki İronədə bə zəmin suğut kardə Ukrayna təyyarə barədə təhğiğon İroni ko və vəzifəy.

Əli Abedzodə votışe: bə ım təyyarə rəket həmləon barədə iddio bıə sohbəton ki Amerkə və bəzi mediyaon tərəfo elan bıə ğeyri koşınasi və ğeyri mənteğiye boçi ki de ım təyyarə həmzəman çand qılə sərnişinə təyyarə həm İroni osmonədə pəre holədə bin.

Çoşanbə, Tehroni ayrportiku rost bıə qıləy Ukrayna təyyarə çand dəğiğə pəre bəpeştə osmonədə otəşış qəte və Tehroni ətrofədə bə zəmin suğutış karde.

İron və Ukrayna prezidenton bə ım hadisə illəti barədə dəğiğ təhğiğ karde zəruriyati təkid kardışone.