Ərdoğan: Tırkiyə çı Suriyə ərazi işğal karde pidəş ni.

Tırkiyə prezident ijən bə Suriyə ıştə təcavuzi tovcih karde xoto votışe: Tırkiyə çı Suriyə ərazi işğali pidəş ni.

Bə Anadoli aqentiyəti raporti əsos Rəcəb Təyyeb Ərdoğan iddeoş karde ki Suriyədə Tırkiyə hərbi iştirok bə Suriyə avarəon komək iyən Suriyə sərhəddon əmniyyəti təmin kardeye.

Tırkiyə prezident Moskvaədə ıştə muzakirəon nəticə çok zınəş be və əlovəş karde: əqə otəş bast Suriyə tərəfo rioyət nıbu Tırkiyə əməliyaton ijən bino bəbe.

Ərdoğan ıştə tojə sohbətonədə ıştə ğərbi mıttəfiğonış tənğid karde.

Tırkiyə jıqonə iddeo qıləy şərayetədəy ki əv tojədən Suriyə avarəonku bənə əbzar istifodə karde xoto Yunanıstaniku tələbış karde ki Suriyə avarəon bə Avropa varid bey zəminə hozzo və ıştə sərhəddon oj kə.

Tırkiyə qılə holədə Suriyədə ıştə hərbi be ğanunə əməliyaton tovcih kardedə ki de terrorizm mubarizə barədə əvəzi əmələn bə Suriyədə terroriston komək karde holədəy.

Suriyəku həm xəbə omə ki anti Amerkə hərəkəton dəvom kardedə və Suriyə şərğ, Deyruzzur məntəğədə cəmaət bə Amerkə işğalçiye hərəkəton əleyh etıraz kardedən.

Suriyə Əlhəsəkə ostaniku həm xəbə ome ki bumi əhali bə Amerkə hərbyçion ım məntəğəku dəvardə icozə dodə nin.