Az.R-ədə karantinə rejim dıroz kardışone.

Boku Vəziron Kabineti tono de koronavirusi mubarizə Operativə Ğərarqohi Respublika əraziədə karantinə rejimi tosə iyunə manqi 15-minə ruji şanqo saat 12 təmomi ğıvvədə bıe elan kardəşe.

Tosə ım muddəti devləti marzon dəbastə vəziyyətədə bəmanden. Aviasiya, zəminisəpeyə daxili və xariciə sərnişin kırniə reyson bino nibəkarden.  Həmən ğəror doəşone ki, kali karantinə məhdudiyyəton çe arə peqəton. Çe mayə manqi 31-minə ruji bəpeş məmləkəti həmə dıjdə ticarətə mərkəzon fəaliyyət bərpo bəbe. Ojə həvoədə vərzeşə musabiğaton, hənəkon dəvunie icazə bədon, də şərti ki, əyo təmoşokaron huzur nıboşone. İctimai iaşə muəssisəon fəaliyyəti tosə şanqo saat 22 –i dəvom karde mumkun bəbe.

Operativə Ğərərqoh bə əhali nəzə rosnidə ki, bə tibbi –profilatik və sanitariya ğaydəon ciddi əməl bıkardon. Çunki məmləkətədə bə korona mərəzi mubtəlo bıəkəson miğdar hələən vey bedə. Operativə Ğəroaqohiku bə Sputnuk Azərbaycani məlumat doəşone ki, tosə mayə manqi 30-i Respublikadə 4989 nəfər bə ım noxəşi mubtəlo, çəvonədə 3125 kəs mualicə bıə, 58 nəfəri vəfot kardəşe, 1806 qılə noxəşin haliədə mərizxonəonədə mualicə bedə. Çəvonən 50 nəfəri vəziyyət qon, 67 nəfəri vəziyyət isə miyonə dərəcədə qone. Ğərarqohi təşkil kardə brifinqədə Ramin Bayramlı votəşe ki, keşvərədə  korona noxəşi qətəkəson ən vey, yəni 47%  Boku əraziədəy.  Qəncə- Ğəzax de 13,6 %, Aran zona de 11,1% peşonə vıronədə mandedən. Lankonədə korona noxəşinon miğdar Respubluikadə ım mərizon 9,2% -i təşkil kardedə. Bayramlı ımən ğeyd kardəşe ki, haliyədə dınyo çe pandemiya iminə mərhələ bə sə jedə. Odəmon qirəm bə karantinə ğaydəon de intizami əməl bıkardon, bəvədə epidemik mənbəon obəkuşien. Əks təğdirədə zımıstonə vaxtonədə epidemiya dıminə ləpə bə əməl ome ehtimalış real bıe bəzıne. Ey həmən bə xaric səfər kardə icazəon doə bə peş, bə jəqo odəmon COVİD – 19 pasporti doe imkani  həxədən qəp jəşe, votəşe ki ım məsələ hələ muzakirə mərhələdəy.