Az.R-ədə karantinə rejim tosə avğusti 1-y dıroz kardışone.

Boku hokuməti Sər vəzir Əli Əsədov məmləkətədə karantinə rejimi tosə avğustə manqi 1-y dıroz karde barədə ğəror doəşe. Vəziron Kabineti tono Operativə Ğərarqohiən elan kardəşe ki, iyunə manqi 21-minə rujiku tosə iyuli 5-i Boku, Qəncə, Sumğait, Lankon, Masəlu, Cəlilobod, Yevlax və Abşeron rayononədə şiddətinə karantin tətbiğ bəkarden.

Im rayononədə bı muddəti dırozi dıjdə ticarətə mərkəzon, ictimai iaşə və təhsilə muəssisəon, muzey və numayişqahon, dəlokxonəon, reçinəti və kosmetikə salonon dəbastə bəben, ojə həvoədə vərzeşə tədbiron dənıbəvordınen. Bo əhali SMS – içazə sistem bərpo bedə, yəni kəyku bə kəno beşe zərurət bə meydon omeədə bəpe bı barədə bə muvafiğ xidməti xəbə bıvğandi və icazə bısəni. Əmo ım bə hokuməti nomrnklatur vəzifədaron və həmonə idarə həmkaron aid nibəbe. Metropoliten ko bəkarde , park, bulvar və istirahətə mərkəzon fəsliyyətən məhdud nibəbe. Maide.az sayt xəbə dodə ki, bə ım məsələ dair təşkil bıə mətbuatə konfransədə Xarici Koon Vəzarəti sıxanəvot Leyla Abdullayeva bəyon kardəşe ki, SMS-icazə bə 65 sinnisə vey bıə odəmon aid nibəbe, əmo  bəvon məsləhət zınedəmon ki, mumkun ğədər kədə bınışton, bə kəno benışon.

Huğuğşunas Əliəskər Məmmədli bə Azadi Radio votəşe ki, şəhrıvandon çe kəyku beşe məhdud karde bə Az.R konstitusiya 71-minə maddə zidde. Hokuməti tətbiğ kardə im məhdudiyyəton fevğəladə vəziyyəti həxədə ğanuni çərçivədə tətbiğ bənine, ımən bəpe de Parlamenti ğərari təsdığ bıbo. Hətto Prezident Əliyeviən i kərə bımi işarə jəşbe. Deputat Zahid Oruc isə hokuməti ım ğərari 1992-minə sori ğəbul bıə de “Sanitar – epidemioloji saleməti həxədə” ğanuni əsasin karde piəşe.

Deputat Fazil Mıstəfoən bə ım məhdudiyyəton tərəfdar beşə, votəşe ki, tibbi maska ğıyməti bə 5 kopik eğande lozime ki, hiç kəsiku bə çey nıjəne ro vonə nıbo. Milli Məçlisi iclasonən bəpe  bə təxir eğandə və bə onlayn rejim ovoştıniə bıbo.