Tovuz rayoni de Ermənistoni marzədə hərbi munağişə.
İyulə manqi 12-ədə çe Az.R Tovuz rayoni de Ermənistoni marzədə atəşbast darşie. Azərbaycani Mudafiə Vəzarət ım munağişədə Erməniston tərəfış qınokar zıne.
“Ovqat.com” sayti məlumatədə votə bedə ki, Ermənistoni Mudafiə Vəzarəti sıxanəvot Şuşan Stepanyani məlumat doəşe, Az.R ləşkəri sərbazon UAZ hərbiə avtomobilədə bo marzi darışte cəhd kardəşone. Ermənistoni tərəfi xəbədo kardə tirəndazi bəçəton əvon həmonə maşin tərk kardəşone və bəştə mevğe oqardən. Çimi bə peş Azərbaycani tərəfi bə Ermənistoni tərəf artilleriya otəşon ğandəşe.
Azərbaycani tərəf ım insidenti səbəbkar Ermənistoni hisob kardedə. Prezident Əliyevi Respublika Əmniyyətə Şura iclas qırd kardəşe, votəşe ki, Azərbaycani beynəlxalğə arenadə vey yolə nailiyyəton bə dast vardəşe. Çe Ermənistoni ım təxribati əsasə səbəbonədə qıleyən çəmə imici beynəlxalğə aləmədə saru eğandeye.
Əmo Azərbaycani muxalif ğıvvon bə ım məsələ munasibət çe hokuməti rəsmi mevğesən fərğine. “Millii Şura” İdarə heyəti uzv Fuad Ğəhrəmanlı “Azadlıq.info” saytədə bə - “ım munağişə ki bino kardışe?” – parsi cəvobədə nıvıştedə ki, -“bə çəmə ərteşi məxsus maşini bə sərhədi əks tərəfi ovaşte səbəbi bəpe Mudafiə Vəzarət izah bıkardo. Əqər ım dıvuə faktebu əv ımi təkzib kardənine”.
Çe Az.R Avropa İttifağədə sabiğ səfir Arif Məmmədov ki, azərbaycanıjə siyasiə muhaciron Avropadə “AND” – yəni bo “Azərbaycani Ro Demokratiya” nomədə təşkilati rəhbəronədə qıleye, ey ım insident çe Boku hokuməti xalqi bə dast dənoe ro qıley provakasiya hisob kardəşe.
Az.R nafkonə Musafiə vəzir Rəhim Ğaziyevən hokuməti ım siyasət tənğid karde səbəbiku polison tərəfo dastqir bıə. Devlətə Əmniyyətə Xidməti de Sər Prokuratura bahəm elan kardə məlumatədə votə bedə ki, bə çey munasibətədə Cinayətə Məcəllə de bə devləti əleyh oşkoə dəvəton, həmən təxribat maddəon cinayətə ko bino kardəşone.
Çe Avropa İttifaği bə Xarici Siyasəti dair press-ofisi, Rusiya Xarici Koon vəzir Serqey Lavrovi ıştə muraciətonədə Azərbaycan və Ermənistan vanq kardəşone ki, atəşbasti bərpo bıkardon, de Minsk Qrupi həmsədron bahəm molağaton roy ıştə əhali bə sulhi təşviğ bıkon.
