Bo Mirhafiz Cəfərzodə hukm handə bə

2022-minə sori noyabrə manqədə de Xarici xususi xıdmət orqanon casusəti karde ittihomi qətə bə tolışə fəol Mirhafiz Cəfərzodə hojo de həmonə ittihomiən hukm handə bə.

De Boku Qonə Cinoyəton Məhkəmə oxonə iclasədə handə hukmi əsos, Mirhafiz.Cəfərzodə de casusəti karde bə devləti xəyonət taxsi 16 sor mıddət ozodətiku məhrum kardə bə.
Mirhafiz Cəfərzodə 2022-minə sori noyabrə manqədə dastqir kardə bəbe. Əv de Cinoyət Məcəllə 274-minə (bə devləti xəyonət) maddə ittiham kardə bə. Devlət Əmniyyətə Xıdməti (DTX) de əçey dastqirəti səbəbi band pevolo kardə rəsmi xəbədə iddio bedə ki, Mirhafiz Cəfərzodə Azərboyconədə hərbi təyinatinə obyekton vırə dəğiğış kardə, çəvon lokasiya və əlidə məlumotonış bə  İron dəvonə.
Bə rəsmi mlumot Mirhafiz Cəfərzodə ittihomi təsdığ kardə video ziyod karde iddio bedə.
Mirhafiz Cəfərzodə boə, Seyidəli Cəfərov əçe fikiron təhrif kardə be votedə.
Seyidəli Cəfərov Mirhafizi Rusiya vətəndor be, 2021-minə sori sentyabrədə əçe Azərboyconiku bə Rusiya oqardə fəxt qətə be bəyonış kardə:
“Əvşon sərhədədə de separətəti karde vonə qətə.  Mirhafizi bə əvon votəşe ki, az ğərəz tolışi zıvonədə dərs kitobon çapi, əlidə hiççim nıvıştə ni, əqəm nıvıştəme nuşu bıdənən bəmi. Hiç qılı sobut nıbə vırədə əv tosə şanqo saat 3 oğətə bə ”.
De Seyidəli Cəfərovi sıxanon, oğətə fəxt bəy ko karde təklif kardə bə:
“Bə Mirhafizi votə bə ki, “tı bo əmə ko bıkə”. Rusiyadə jiə məhşur tolış iyən dindorə fəolon barədə bəmə məlumot bıdə. Çımı boə çın təklifiku imtinoş kardə, bə 56 sinədə bə xonəxo joğo hərəkəton damıbə” cəvobış doə.  Bo əçey Azərboyconiku beşe “stop” noə bə. İ sorədə 4 kərə əvşon norohət kardə, co-co viranədə de əy vindemonşon kardə.
Seyidəli Cəfərov Mirhafizi, 2022 minə sori noyabri 11-də maaştəvonə saatonədə Devlət Əmniyyətə Xıdməti koəkon tərəfo məhkəmə ğəror nıbə kəyku bardə bə.
Mirhafiz Cəfərzodə huğuğon mıdafiə kardə ictimai fəol Rahim Şalıyev, Devlət Əmniyyətə Xıdməti  tərəfo pevolo kardə videomaterialədə Mirhafizi qəpi montaj  be bə nəzə rosnidə.