Az.R de Ermənistoni marzədə munağişə hevuj bıə.
İyuli 12-ədə Tovuz rayoni de Ermənistoni marzədə vağeə bıə hərbiə munağişə iyuli 13, 14-minə rujonədən dəvom kardışe. Har dı tərəfi bə yəndı hərbi infrastrukturon zərbə jeşone, har dı tərəfi hərbiəvonon arədə tələfaton bin.
Azərbaycani Mudafiə Vəzarəti iyuni 14-də bəyon kardışe ki, bə Ermənistoni hərbi texnika , komanda məntəğəon, hərbi ehtiyaton zərbə jəşe əvonış məhv kardə, ıştə bepilotə aparaton video kəşemononən təğdim kardəşe. “Teref.az” çe “Atlas” Tədğiğatə Mərkəzi hozo kardə analitik məğalə dərc kardəşe. Əyo votə bedə ki, Azərbaycani ərteşi hərbiə əməliyyaton dəvom karde niyyət hestışe. Mumkune ki, nezə rujonədə ım əməliyyaton coğrafiya Naxçıvan və Bandıkuhə Ğərəboğiən əhatə bıkardo.
Çe Azərbaycani tərəfi 3 rujnə canqi nəticədə 11 nəfər hərbiəvon, çəvonədə 1 nəfər qeneral, 3 nəfər sər zabit, 1 nəfər mulki odəm bə həlokət rəsə. Bə ım mulki odəmi marde səbəbi Azərbaycani Xarici Koon Vəzarəti bə beynəlxalğə ictimaiyyəti muraciət vığandəşe ki, əvon Ermənistoni 1949-minə sori Cenevrə Konvensiya darışte qorə mızəmmət bıkardon. Ermənistoni Xarici Koon Vəzarətiən Azərbaycani ərteşi bə Ermənistoni Berd şəhəri arteleriya otəşə zərbə je bə dınyo iştimaiyyəti nəzə rosniəşe, Azərbaycani tərəfış dincə əhali bə hədəf seədə məhkum kardə. Azərbaycani ərteşi ım hərəkət “Haqqın.az” sayti ki, bə Boku hokuməti nezə mevğeədə mandedə, təsdiğ kardəşe. Ermənistani Mudafiə Vəzarəti ıştə 2 nəfər zabiti həlok bıe xəbə doəşe.
Erməniston çe Azərbaycani təcavuzi barədə bə Kollektivə Əmniyyətə Muğavilə Təşkilati, bə Avropa təşkilaton, bə İbə Milləton Təşkilati Əmniyyətə Şura muraciəton vığandəşe. Azərbaycani tərəfiku jıqo muraciəton bıə ni .
Jıqo vəziyyətədə İMT Sər katib Antonio Quterreş, Avropa İttifaği Xarici koon və əmniyyətə siyasəti dair sıxanəvot Peter Stanon, AİŞ Devlətə Departamenti sıxanəvot Morqan Ortequs, Rusiya XK vəzir Serqey Lavrov, həmən Kollektivə Əmniyyətə Muğavilə Təşkilati rəhbəriyyət çe ım insidentiku ıştə norohəti bəyon kardəşone, tərəfon vanqşon karde ki, bə hərbiə əməliyyaton dərhal orəx bıdon, otəşbasti bərpo blkardon.
