Erməniston və Azərbaycan Respublika miyono bıə behron və daveon bəpe siyasi cəhəto həl bıbu; İron komək kardeyro hozzıe.

İroni prezident aparati rəis Məhmud Vaezi Azərbaycan Respublika və Ermənistoni sərhəddonədə tojə daveon barədə bə siyasi roon, ərazi hakemiyəti rioyət karde iyən yande mənafe nəzrədə qəte çərçivədə mınoğişə həlli təkidış karde.

Bə İrib raporti əsos Məhmud Vaezi votışe: Erməniston və Azərbaycan Respublika  sərhədədə daveon 2 qılə kişvəron mənafe təhdidəkə iyən məntəğədə anti stabil vəziyəti nımonəy ki niqəranion bois bıə.

Vaezi təkidış karde: bə hamsoyəti iyən vositəçiti zərfiyəti əsos İron karde bəzne bə Boku iyən İrəvani miyono bıə tojə bıhrani həl karde komək bıkə.

İroni xarıci vəzir Muhəmməd Cəvad Zərif həm zinə həm bə Azərbaycan Respublika  və həm bə Ermənistoni xarıci vəziron zanqış karde və 2 tərəfonku pidəş be ki votımonon prossesi bino karde xoto canq iyən dav şiddətiku kam kon.

Əmmo canqi meydoniku xəbə ome ki Erməniston zinə sərhədədə Azərbaycan Respublika  qıləy muasir bepilotə təyyarəş məhv karde.

Ermənistoni hərbiçiyon həmçınin tovuzə məntəğədə ijən de qıvoninə təchizat və artileriya bə Azərbaycan Respublika  dion həmləşon karde; tosə ısət çand nəfər ım həmləonədə kıştə ya xot zəxmin bıən.

Canq bə Kibr meydon həm daxil bıə və xəbə ome ki Azərbaycan Respublika həxıron bə Ermənistoni i minə vəzirəti məlumat ərosnə sayti həmlə və əy hək kardəşone.