Bə Tovuzi marzi munağişə Ğərbədə kom munasibət nişon doşone.
İyuli 12 –ku tosə 16 Azərbaycani Tovuz məntəğədə de Ermənistoni marzədə vağeə bıə hərbiə munağişə dınyo miğyasədə bə muzakirəon səbəb bıe. De ım məsələ əlğədar Azadi Radio oj kardə icmalədə votəşone ki, Turkiyə çe Azərbaycani, Rusiya isə çe Ermənistoni tərəfədə mandedə.
Moskva isə rəsmən ım iddia rədd kardışe, Kremli sıxanəvot Dmitriy Peskovi votəşe ,ım munağişədə Rusiya ıştə vasitəçiəti təklif kardəşe. Vırəş heste ki, bıvotəmom, İroni hokumətiən ıştə jıqo mevğe bəyon kardəşe. İroni Xarici Koon Vəzarəti sıxanəvot Seyid Abbas Musəvi Azərbayçan və Erməniston tərəfon bə təmkin dəvət kardışe, votışe ki, çəmə reqioni bəpe bə jıqo munağişon dıço nıkardi.
Amerika Konqresmenon Adam Schiff və və Brad Sherman Azərbaycanşon bı munağişədə bənə təcavuzkari zıne. “Milli Şura” sədr Cəmil Həsənli xəbə dodə ki, AİŞ Konqresədə bə Azərbaycani hərbiə koməkon səpe ğədəğə noe həxədə təklifon muzakirə bəkarden, və Əliyev hokuməti vanq kardedə ki, deştə lobbiə ğıvvon zuy çimi vəy bısəno. Əks təğdirədə AİŞ bə Azərbaycan nəinki hərbi, həmən ıştə siyasi və diplomatik koməkonkuən imtina bəkarde.
Çe Yolə Britaniya İcma Palata 4 nəfər numayəndə bə parlamenti təklif vığandəşone, Ermənistani 12 iyul hərəkət təcavuz hisob kardəşone, hokumətşon dəvət kardə ki, Ermənistoni ım hərəkəti mızəmmət bıkardo.
“İnfoteka 24” sayt isə xəbə dodə ki, Fransa Parlamenti həmə fraksiyon bahəm bəyannamə ğəbul kardəşone, Boku hokumət 12 iyul munağişədə mığəssir zınəşone. Votəşone ki, “əmə həmə zınedəmon ki, hərbi əməliyyaton bino bıe çe diktator İlham Əliyevi fəaliyyəti nəticəy. Iştə rışvəxorəti, ğarət, xalği əsasə bəşəri huğuğonku məhrum kardə siyasəti eparçınie ro muharibə, hamsuə xalqi və çey devləti qınokar, həmən deşmen nişon doe ən rohətə metode. Turkiyən bə ım avantura dastək doe təsaduf ni. Çeyən Kipri işğal karde, Suriyadə, Liviyadə xətokarə əməlon, ısətən bə Cənubi Ğəfğazi nufuz karde ro bardə siyasət, həm ım reqionədə əmniyyəti təhdid kardedə, həmən bə Fransa və Avropa İttifaği mənafeyon zidd beşedə”.
