İron iyən Azərbaycan Respublika miyono iğtisodi həmkarion hevuj bəbe.

İron İslam Respublika iyən Azərbaycan Respublika prezidenton bə Tehron-Boku miyono həmmə tərəfinə əloğəon inkişofi cəhətədə səy-cəhdon ziyod karde zəruriyyati təkid kardışone.

İron İslam Respublika prezident Həsən Ruhani iyən Azərbaycan Respublika preziden İlham Əliyev zinə bə Ğıbonə İdi xoto de yande telefoni sohbət kardeşone və ım yolə idi bə bəştə millət-dıvləton təbrik voteşone iyən umidəvoşon karde ki həmmə mısılmonon ım yolə idi bərəkətiku istifodə kon.

İron İslam Respublika prezident bə 2 qələ kişvəri miyono bıə əloğə iyən çokə həmkarion həmçenin muğaviləon bə nəticə rosniyeyro rəsmi şəxson səy-cəhdi işarə iyən təkidış karde: de Azərbaycan Respublika həmmə tərəfinə əloğəon inkişof bo əmə vey muhimme iyən umidəvumon ki muxtəlif baxşon xususi Rəşt-Ostoro ğətarə xətti çərçivədə 2 qılə kişvəri miyono bıə həmmə muğaviləon icra bey rə şohid bıbəmon.

Ruhani bə İronədə de Koronavirusi mubarizə barde meydonədə muvəffəğiyəton işarəş karde iyən votışe: ım sahədə bə dast omə təcrubəon bə Azərbaycan respublika doe hozzomon.

Azərbaycan Respublika preziden İlham Əliyev həm ım votemonədə Boku-Tehroni miyono bıə əloğəonış mısbət zınəş be iyən votışe: Rəşt-Ostoro ğətarə xətti pryekt vey bo əmə vey əhəmmiyətine iyən de mane-mişkilaton arəku barde rə ım loyehə komil bəkamon.

İlham Əliyev de Koronavirusi mubarizə barde meydonədə İroni muvəffəğiyəton bə təğdiri loiğ zınəş be və ım sahədə həmkarion iyən İroni təcrubəonku istifodə tələbış karde.