İron bə Ğərəboği mınoğişə tərəfon notaş do.

Sərhəddon hədəf qəte iyən sənibəton bə İroni dion tərəf rəket ğandey xoto zinə şəv İroni xarıci vəzarətxonə bə Ğərəboği mınoğişədə işterak kardə tərəfon notaş do.

Bə İRNA aqentiyəti raporti əsos, İroni xarıci vəzarətxonə sıxanəvot votışe: əqə bə İroni sərhəddon tərəf ijən rəket ğande dəvom peydo ko İron be hərəkət iyən sakit nibəmande.

Səid Xıtibzodə dave tərəfon bediğğətətiku tənğid və təkidış karde: İroni sərhəd məntəğəonədə jimon kardə şahrvandon coni oqəte çəmə silahinə ğıvvon sıə xəte və İron çəvon oromətətiku dənibəvarde.

İroni xarıci vəzarətxonə sıxanəvot bə həminə həmləon reaksiya nişo doe xoto İroni hərbi əməliyoton barədə muntəşir bıə xəbon təkzibış karde.

İroni Şərği Azərboycon ostani Xodafərin şəhri fərmondor Ali Əmirirad zinə elanış karde ki Ğərəboği canqi nəticədə tojədən 10 qılə rəket bə ım şəhri Ğulibiqlu iyən Kədxalu dion qıniyə.

Dəvardə rujon yani Ğərəboğədə Canqi bino bey əvvəlnə rujiku tosə bə ısət 50 qıləku vey rəket muharibə meydoniku bə Xodafərin məntəğə tərəf ğandə bəy.

İron islam Respublika çimi bənav həm de rəsmi bəyoniyə bə Erməniston və Azərbaycon Respublika rəsmi şəxson ım məsələ barədə eteroz kardəş be.

Ğərəboği barədə Azərbaycon Respublika iyən Ermənistoni miyono tojə dıvrə daveon Sentiyabrə manqi 27 ku bino bıə.