Ğərəboği tojə dıvrə canqədə 633 nəfər Erməni hərbiçi kıştə bıən.
Ermənistoni rəsmi şəxson Ğərəboği tojə dıvrə canqədə ım kişvəri kıştə bıə hərbiçion miğdori 633 nəfər elanış karde.
Bə Royterz aqentiyəri xəbon əsos, Ermənistoni ərtış de qıləy bəyoniyə vositə izhorış karde ki de tojə 29 nəfər əsqəri kıştə bey, ısət Ğərəboği tojə dıvrə davonədə ıştə coni dastiku doə hərbiçion miğdori bə 633 nəfər rəsə.
Ğeyd kardənine ki 1990 ədə iyən Ğərəboği bədıvrə canqədə Erməni kıştə bıə hərbiçion miğdori 30 həzo nəfər be.
Əmo canq meydoniku oxonə xəbə ıme ki məvuji Ermənistoni mudafiyə vəzarətxonə iddio kardedə ki Azərbaycan Respublika qıləy vertəliyoti mınoğişə məntəğədə de rəketi vositə məhv kardəşe.
Erməniston həmçenin zinə bə Nəxçivon muxtar Respublika tərəf həm rəketış ğandə.
Azərbaycan Respublika mudafiyə vəzarətxonə tojədən bə ğeyri hərbi məntəğəon rəket ğandey barədə Ermənistoni həmləon tənğidış karde.
Azərbaycan Respublika həm beko nımade və de tojə əməlioton vositə Ğərəboği Şuşa iyən Xankəndi məntəğəonədə bıə Erməni vırə iyən bazaon bombardımonış kardə.
Azərbaycan Respublika prezident İlham Əliyev həm tojə tvitter mesajədə Xucavənd məntəğədə bıə Ağbulağ, Axolu iyən Xirmancinq diyon ozodətiku xəbəş do.
Qıle holədə ki de Rusiyə vositəçiyəti dəvardə haftə cumə Oktiyabri 9-ə rujiku Ğərəboğədə otəş bast elan be əmmo mınoğişə məntəğəonədə dave ijən dəvom kardedə.
Ğərəboği barədə Azərbaycon Respublika iyən Ermənistoni miyono tojə dıvrə daveon Sentiyabrə manqi 27 ku bino bıə.
