İrağçi: İroni təklifon karde bəzne Boku-İrəvoni miyono sulh roon zəminə bıbu.

İroni prezindenti məxsus nımoyəndə bə ısətnə zəmoni həssas bey iyən Boku-İrəvoni miyono sulhi tale təin və muzakirə roon oj karde zəruriyati təkid kardışe.

Bə İrna raporti əsos, Seyd Əbbas İrağçi de Azərbaycan Respublika və Rusiyə rəsmi şəxson muzakirə bəpeşt zinə şəv bə Erməniston varid be.

İroni xarıci vəziri siyasi muavin bə İrəvon varid bey faxti jurnaliston cəmədə votışe: Boku iyən Maskvaədə vey çokə muzakirəon dəvoniyəmone və ısət sulhinə roon peydo kardeyro de Erməni rəsmi şəxson həm muzakirə bəkamon.

Əv bə İroni hamsoyətiədə Erməniston iyən Azərbaycan Respublika ğəror qəte işarə və əlovəş karde: İronədə har 2 qılə kişvəronku şahrvandon oroməti şərayetədə co odəmon kənoədə jimon kardeydən çən İroni nəzə har 2 qılə kişvəron barədə həmmişə balans iyən bərobər be.

Seyd Əbbas İrağçi votışe: İroni ibtikor və noyəvardəti hukmən məntəğədə qıləy zumand iyən rişədorə sulhi binovrəy.

Tojədən, Ermənistoni xarıci vəzir Zohrab Menatsakiyan, bə Riyanavosti aqentiyəti doə mısohibədə Ğərəboği mınoğişə sə bey barədə İroni doə təklifonku ğədrdonətiş karde.

Ğərəboği barədə Azərbaycon Respublika iyən Ermənistoni miyono tojə dıvrə daveon Sentiyabrə manqi 27 ku bino bıə.