Rusiyə iztirori(təcil) məxsus vəzarətxonə ğıvvon bə Azərbaycan Respublika varid bin.

Rusiyə iztirori(təcil) məxsus vəzarətxonə ğıvvonku 20 nəfər Ğərəboği tojə ozod bıə əraziku minaon beəsər və məhv kardey xoto bə Azərbaycan Respublika varid bin.

Bə İrib raporti əsos, Azərbaycan Respublika mudafiyə vəzarətxonə elanış karde ki de ım qurupi bə ico bıə roboton və şəxson Ağdam tojə ozod blı əraziku minaon pok bəkardın.

Bə tojə raporti əsos, tosə bə ısət, Ğərəboği 44 rujə canqi nəticədə mandə minaon tıpı nəticədə 500 nəfəriku vey ğeyri hərbi ıştə coni dastiku doəşone.

Ğərəboğədə Azərbaycon Respublika iyən Ermənistoni miyono tojə dıvrə daveon Sentiyabrə manqi 27 ku bino bıə be ki oxoy sə Rusiyə, Azərbaycan Respublika iyən Erməniston Noyabri 10 ım dıvrə canqi səkardeyro qıləy mıştərək sazışi imzo kardışone.

Həminə sazişədə sıvoy canqi sə karde, bə humanitar məsələon iyən əsiron və cənazəon vırə bə vırə kardey təkid bıə iyan ğeyd be ki Rusiyə sulhmərominə ğıvvon təmas və dave xəttədə sulhi təmin bəkan.

Ğeyd kardənine ki Ğərəboği muxtəlif baxşon əmniyəti təmin karde tosə 5 sor bə Rusiyə sulhbanon qi haştə bəy, peşo bəzi məntəğəon tale barədə ğərolon təin bəbe.