Yunis Səfərovi məhkəmə istintağ bə orəx rəsə

Yunis Səfərovi ki, Qəncə şəhəri icra sərdar de qolulə jəşbe, və həniən 11 nəfəri məhkəmə istintağ bə orəx rəse. Im ko təğribən 1 sorbe ki, Boku Qonə Cinayəton Məhkəmədə tədğiğ bedəbe

Orəxnə məhkəmə iclasədə vəkilon xeyli vəsadəton bə nav doəşone. Əmo hakimi çəvon hiç qılə təmin kardəşni. Həmonə vəsadətonədə qıley çe Yunisi vəkil Bəxtiyar Hacıyevi təklif kardışe ki, zərərdidə məhkəmədə bəpe iştirak təmin bıbo ki, əmə çeyku bə taxsikori munasibəti xəbə se bızınəmon. Ey qaspu taxsikori baxşe fikir hestışebu.

Çe zərərdidə Elmar Vəliyevi numayəndə Fəxrəddin Səfərov isə elan kardəşe ki, çey səhhət bey imkan dodəni ki, məhkəmədə iştirak bıkardo. Hakim Əfğan Hacıyeviən qıley Turkiyə mərizxonəku bə Vəliyevi səhhəti dair diaqnozi barədə bə məhkəmə vığandə sənəd handəşe. Məlum bıe ki, Vəliyevi əqli vəziyyət jıqoe ki, əv bey votəyon dərk karde və cəvob doe holədə ni.

Məhkəmə proses marti 16-də dəvom bəkarde. Prokuror bə məhbuson çand sor cəzo doe barədə tələbnomə ebəhande.

Yunis Səfərov və 11 nəfər de Cinayətə Məcəllə 30 qılə maddə ittiham bedən. Çəvonədə 2 nəfər polison kıştəşone. Çəvon ailə uzvon məhkəmədə iştirak kardedən və ıştə fərzəndon beqıno bıe votedən. Yunis Səfərov isə Qəncədə bə əhali munasibətədə bə ğeyri – insonə əməlon rəvoc doe səbəbi icra sərdari kışte pie votəşe, həmən ım 11 nəfəron ki, ittiham bedən, bı koədə hiç qıley iştirak və əlağə nıbe bə məhkəmə nəzə rosniəşe.

“Xeberman.com” sayti rəhbər yurnalist Polad Aslanovi ənəhardə aksiya oğətəşe. Bı həxədə bə “Turan” İnformasiya Aqentiyyəti çey jimoni həmro Qulmirə Aslanova xəbə doəşe, votəşe ki, Poladi ıştən bəştə moə zanq kardəşe ım xəbə votəşe. Ombudsman aparatədən ım fakt təsdiğ kardəşone.

İbrimi Zahirəddin. Çe Rusiya Yekaterinburğ şəhəriku, İİR sədo, tolışi radio.