Boku hokumət ıştə repressiya əməlon dəvom kardedə
Boku hokuməti repressiya siyasəti dəvom hestışe. Bə siyasi və dini fəalon əleyh bıhtonə cinayətə ko bino kardedə, əvoni bə dırozə muddət bə zindon dənodə
Çəvonədə qıley Azərbaycani İslamə Partiya sədri əvəz Hacı İlham Əliyev və dini fəal Mehman Rzayeve. Bəvon devlətiə xəyanət ittiham bə nav doəşone. “Azadi radio” Boku Qonə Cinayəton Məhkəmədə nubətinə muhakimə iclas dəvarde həxədə xəbə doəşe. Bı iclasədə “İslamın səsi” və “Fakt xəbər” saytonədə dini ixtilaf təbliğ bıə materialon pevolo bıe barədə iddiaon təhğiğ kardəşone. Vəkil Cavad Cavadovi bə ım epizodi dair çe Rabitə vəzarəti Elektronə Əmniyyətə Mərkəziku bəştə doə parsi sə cəvob bə məhkəmə təğdim kardəşe. Çe ım cəvobiku məlum bə ki, həmonə saytonədə dini nifrət və ixtilaf təbliğ kardə nıvıştəyon dərc bıə nin. Hakimi ım sənəd bə məhkəmə materialon əlavə kardəşe.
Marti 9-minə ruji 12 nəfəro ibarət i qrup siyasi fəali məhkəmə dəvom kardəşe. Əvon ponə sori iyulə manqi 14-də paytaxtədə dəvardə Bə Ərteşi dastəkə aksiyadə iştirak kardə 37 nəfər muxalifə siyasiə fəalonədən. Isət əvonşon bə 3 qrup co kardə və Boku rayon məhkəməonədə çəvon muhakimə şedə.
Hokumət de rışvəxorəti mubarizə nomiən xeyli məmuron bə məsuliyyət cəlb kardedə. “Teref.az” sayt xəbə dodə ki, Qəncə şəhər Devlətə Sosialə Mudafiə fondi 6 nəfər məmur de korrupsiya və rışvəxorəti ittihami dəstqir kardəşone. Ğeyrəz ımi çe Naxçıvani sabiğ daxili koon vəzir və sabiğ təhsilə vəzirşonən bə zindon dəğandə. Manqi bə nav sabiğ Əhali Sosialə Mudafiə vəzir Səlim Muslumovən bə jıqo ağibəti məruz mande. Dəvardə sori 6 qılə rayoni icra sərdaronən DƏX tərəfo bə cinayətə məsuliyyət cəlb bin. Siyasi analitikon Əliyev hokuməti bardə ım cəzo siyasəti məğsədi ım rışvəxorə məmuron qırd kardə sərvəti çəvon dasto seədə vindedən. Jıqo qıley hadisə bə Devlətə Marzə Xidməti rəisi muavin Əfğan Nağıyevi sə vardışone. Dəvardə sori mayə manqi 16-də əv de rışvəxorəti ittihami dastqirşon karde. Peşonə vaxtonədə bə çey cinayətə koy xitam doşone, hətto əv de “Ğərəboğ” ordeni təltif kardışone.
İbrimi Zahirəddin . Çe Rusyia Yekaterinburğ şəhəriku. İİR sədo, tolışi radio.
