İmişliədə polis lombardi soybi peydo karde zınedəni

Azərbaycanə Respublikadə polis çe əhali huğuğon muhafizə koədə beetina mandedə. Bı barədə Kutləvi İnformasiya Vasitəonədə kafi ğədər fakton təsvir bedə

Əmo nə Daxili Koon Vəzarət, nəən Prokurotura bımon hiç qıley reaksiya dodənin. Cəmiyyətədə jıqo qıley təəssurat bə əməl omedə ki, məqəvuji devləti ım zorə strukturonsən qıley zumandə bə çəş nıçiə mutəşəkkilə dastə hıste ki, bəvon hiç kəsi zu vışkidəni.

Meydan TV İmişliədə lombardi Yağub Əliyev nomədə soybi çe  əhali 1 milyon mənot məbləğinə ğızıl-zinət əşyaon dələmurd karde barədə nıvıştəşe. Çe ım dələdızdiku zərərkəşə odəmon miğdar 900 nəfəre. Əvon çand manqe ki, həmonə odəmi peydo karde ro bə rayoni huğuğə muhafizə orğanon muraciət kardəşone, əmo polis bımi əncom kəşedəni, votedə ki, bə məhkəmə muraciət bıkən.

Zərərdidə Anar Musayevi bə Meydan TV muxbiri votəşe ki, bə polisi votəy muvafiğ bə məhkəmə muraciət kardıme. Məhkəmə çımı şikayət təmin kardışe, ğətnomə doşe. Əmo ım ğətnomə icra hiç qıley orğan təmin kardedəni. İmişli Rayoni Polisə Şebədə bə muxbiri parsi cəvobədə ım fakton təsdiğ kardəşone, votəşone ki, jıqo məsələon mulki xarakterin bıe səbəbiku bəpe məhkəmə dəvon məşğul bıbo.

İmişli İcra hakimiyyətikuən bəyon kardəşone ki, qirəm cəvobdeh tərəf məhkəmə ğətnamə icra nıko, bəvədə əvon lazımi huğuği qəmon şobədon.

Bə Abşeroni Turkan ğəsəbə 2 nəfər 81 və 91 sininiə piəşenon məsxus zəmin dələdızdon de soxtə sənədon qətm kardəşone. Natiğ Məhərrəmsoy nomədə qıley şəhrıvand bə ım beçizə piəjenon vəkil qəte ro koməkəti kardəşe. Həmonə dələdızdon dastqir bıən. Əmo polison omən bə Məhərrəmsoy maşin narkotik şodoəşone və bə çey əleyh cinayətə ko bino kardəşone. Isət əv de 7 sornə zindonə cəzo təhdid bedə.

İbrimi Zahirəddin. Çe Rusiya Yekaterinburğ şəhəriku. İİR sədo, tolışi radio.