İ. Əliyevi de Nəvuzə idi munasibəti 625 nəfər məhbus əfv kardışe.

Prezident İlham Əliyevi Nəvuzə idi ərəfədə 625 nəfər məhbusi əvf karde həxədə sərəncom doşe. Çəvonədə 475 kəs bə azadi beşən, 98 kəsi cəzo mandə hissə niməbənimə kam kardəşone, 3 nəfər bə umrinə zindonə cəzo məhkum bıə məhbuson cəzo de 25 sori əvəz bıə. Əmandəyon şərti, islahə və cərimə cəzo səkəsonin ki, həmonə cəzonku azad bıən.

Bə huğuğə mudafiə təşkilaton doə təhlili əsasən, bə ım siyahi daxil bıə odəmon arədə 39 nəfər siyasiə məhbus heste. Çəvonədə 30 nəfər Nardarani faciə, 3 nəfər Qəncə hadisə məhbusonədən. 1 nəfər dini məhbus – İslami Partiya Ostoro şebə sədr Rufulla Axundzadən azad bıə siyasiə məhbuson restədəy. Əv 2011-minə soriku zindonədəbe.

Huğuğə mudafiəkar Anar Məmmədli bə Azadi Radio votəşe, çok əbi ki, siyasi məhbuson həmə azad kardə bıəbin. Əmo hokuməti ım qəmi şonıdoe nişon dodə ki, çey məmləkətədə siyasiə məhbuson problemi həll karde ro siyasiə iradəş rəsedəni.

Haliyədə Az.R zindononədə 100 nəfərisən vey siyasiə məhbus heste.

Bə Dini Azadion dair Beynəlxalğə Komissiya (USCİRF) bə Boku hokuməti qıley muraciət vığandəşe, əv dəvət kardəşe ki, ıştə dini etiğadə azadi həxədə ğanuni bə beynəlxalğə standarton muvafiğ bıkardo. Im muraciətədə ğeyd kardə bedə ki, Az.R hokuməti dini azadi prinsipon xeyli məhdud kardəşe. De orəxnə əfv siyahi 31 nəfər dini fəali azad bıe musbətə hadisəy, əmo ım ğədər dindari bə zindon dənoe, məhz bı məmləkətədə dini fəaliyyəti çanədə məhdudə vəziyyətədə bıe qıley nışonəy, çe Boku hokuməti bə dini etiğadi sadiğ mandə fəalon arədə problemon mevcud bıeku xəbə dodə.