Çe Yunis Səfərovi məhkəmədə vəkilon votemon kardəşone

Apreli 13 və 15-minə rujonədə Boku Qonə Cinayəton Məhkəmədə Yunis Səfərov və həniən 11 nəfəri muhakimə de cəvon vəkilon votemoni dəvom kardəşe

Sıftə vəkil Bəxtiyar Hacıyevi votəşe ki, bə Yunis Səfərovi hərəkəti bənə devlətə peqordımonə cəhdi qıymət doe ro hiç qıley əsos ni. Bey co qıley devləti xususiə xidmətə orğanon dəstur doe barədən jəqo qıley dəlil bə meydon benışe. İttihamnomədə ım muttəhimon bənə mutəşəkkilə dastə fəaliyyət nişon doe təsvir bedə. Əmo məhkəmə iclason qardışədə məlum bıe ki, ım şəxson veyni de Yunisi oşnoətişon bıə ni. Çəvon de yəndı rabitə barədə ittiham tərəfi hiç qıley subut bə miyon noe nıznışe. Hacıyevi ımən ğeyd kardışe ki, istintaği vaxti bə Yunisi dəvominə işqəncə doəşone, həmən əv i qlıə bo odəm kışte cəhd karde maddə ittiham bənine, ey de devlətə peqordımoni cəhd karde maddə ittiham karde ro hiç qıley əsos ni.   

Muttəhim Vuğar Məmmədovi vəkili votışe ki, Vuğar bə Yunisi bo kirayə mande ro kə peydo kardedədə komək nişon doəşe, ım əv ni ki, əv de Yunisi dastəş bastə, hakimiyyət de peqordınie roy bə dast ovoştınie məğsədşon bıə. Vuğari çe Yunisi məğsədi zıne barədə istintağədə jəqo qıley subut bə meydon benışe. Bı səbəbən Vuğar Məmmədov bəpe bəraət bısəno.

Rasim Mustafayevi, Ceyhun Qurbanovi, Anar Bağırovi və Mahir Əzizovi vəkilonən çe istintaği qardışiku noroziəti ifadə kardəşone, votəşone ki, çəvon mudafiə kardə muttəhimon qınokar bıe həxədə miyonədə hiç qıley dəlil, subut ni. Vəkil Babək Həmidovi izhar kardəşe ki, məhkəmə tərəfo çe mudafiə tərəfi hiç qıley vəsadət təmin nıkarde nişon doşe ki, hakimon bə ım muhakimə obyektiv təhğiğ be tərəfdar nin. Əqər hakim çe prokurori har votəy təsdiğ bakabu, jəqo bə muhakimə prosesi cı ehtiyac heste ki?

Məhkəmə nubəti iclas apreli 20-ədə dəbəvarde.

İbrimi Zahirəddin. Çe Rusiya Yekaterinburğ şəhəriku, İİR sədo, tolışi radio.