Qəncə məhbusi mo bə Prezidenti və Vitse-prezidenti muraciət kardəşe

Qəncə hadisəon məhbus Firudin Zeynalov aprelə manqi 13-minə rujiku əhəhardə aksiya dəvunidə

Çey mo Kifayət Abbasova bə Prezident İlham Əliyevi və Vitse-prezident Mehriban Əliyeva muraciət kardəşe ki, çey zoə Firudini bə Qəncə şəhəri sərdar Elmar Vəliyevi sui-ğəsdədə hiç qıley iştirak və obast bıə nişe. Abbasova çəvonku rica kardəşe ki, məhkəmədə bo çey fərzəndi ədalətinə ğəror bekardeədə koməkəti bıkardon.

Firudin Zeynalovi ailə uzvon bə Azadi Radio məlumat doəşone ki, vəşi mande nəticədə çey səhhət xeyli xərob bıə, əvşon apreli 28-ədə bə Boku İstintağə Təcridxonə tibbi sanitarə şebə dəğandəşone. Həmonə ruji Firudini deştə ailə telefonə qəp jəşe, votəşe ki, həni poye zınedəni, təzyiğış xeyli dərəcədə saru eqıniə. Beynəlxalğə Səlibe Sorxiku omən, de çey holi oşno bıən, bı barədə bə Ombudsmen Aparatişon məlumat doə. Boku  Bəşəri Huğuğon Klubi sədr Rəsul Cəfəroviən izah kardəşe ki,  çe Zeynalovi vəziyyətiku xəbədoe, bı barədə de Ombudsman Səbinə Əliyeva qəp jəşe. Ombudsmani nezə rujonədə de ım problemi məşğul bıe vəd doəşe.

De Zeynalovi bahəm çe Qəncə hadisəon co qıley məhbus, Mahir Əzizoviən ənəharde elan kardəşbe. Əmo ısət ey deştə moə təkidi bə ım aksiya orəx doe məlum bıə. Eyən vote lozime ki, prokurori Firudin Zeynalov bə 19 sor, Mahir Əzizov bə 20 sorinə zindonə cəzo məhkum bıe təklif kardəşe.

De Qəncə hadisəon əlağədar cinayətə ko 2018-minə sori iyulədə bino kardəşone. De ım koy əlağədar 70 nəfər bə cinayətə məsuliyyət cəlb bıə, bo əvon 6 soriku tosə 18 sori həbs cəzo bıriəşone. Yunis Səfərov və həniən 11 nəfəri məhkəmə bə orəx rəsedə. Prokurori Yunis bə umrinə, əmandə muttəhimon 18 soriku tosə 20 sorinə zindonə cəzo məhkum karde pidəşe.

İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.