Boku universiteton reytinq boçi saruy
Çe İbə Milləton Təşkilati bə ali məktəbon dair reytinği nəticəon elan kardəşone. Dınyo 94 devləti əhatə kardə 1 həzo 117 qılə Universiteti arədə Boku 6 qılə ali təhsilə muəssisə çe siyahi 2-minə hissədə , yəni 5-minə sa qıləku saru məğamədə vırə qətəşone
Sıftənə saqılə siyahiədə bənə Tailandi, Meksika, Malayziya, Braziliya, İndoneziya Livan, Misir, Cənubiə Afrika Respublika təhsilə muəssiəon ğəror qəte, İroni Tibbi Elmon Universitetiən 35-minə vırədə mande bə nəzər bısənəmon Azərbaycani ali təhsilə muəssisəon ımsornə fəaliyyəti hiçən məğbul hisob karde nibəbe. Diə məkəmon ki, kali hokumətpərəstə eksperton bımi keşvəri elmi inkişafədə bənə nailiyyəti ğıymət dodən.
Sputnik Azərbaycan sayti Boku Universiteton beynəlxalğə reytinğə siyahiədə jinə vırəonədə mande səbəbon həxədə de bə təhsili dair ekspert Kamran Əsədovi qəp jəşe. Eksperti votəşe ki, haliyədə Azərbaycanədə 51 qılə ali təhsilə məktəbonədə 182 həzo tələbə handedə. Məmləkətədə ali təhsilinə odəmon çe əhali 17%-i ğədərədəy ki, ımən xeyli saruə rəğəme. Universiteti məzunon 42% bəştə ixtisasi muvafiğ de koy məşğul bıe ro imkan peydo kardedən. Keşvəri universiteton mustəğil ğəror ğəbul karde imkaniku məhrumin, maddi texniki baza imkanşonən xeyli kame, hətto elektronə kitobxonəşon ni. Orəxnə 30 sornə elmi texniki nailiyyəton xeyli zəif tədris bedən, dərsə kitobon hejo həmonə vaxtonədə nıvıştəyono ibarəte ki, auditorionədə hələn əvoni tədris kardedən. Azərbaycanədə cəmi 5 həzo 600 xariciə tələbə təhsil sedə, bo muğayisə ro vote lozime ki, Turkiyədə xariciə tələbəon miğdar 160 həzoy. Əsədovi həmən votəşe ki, “Azərbaycani elm dınyoədə ciddi ğəbul bedəni, bə çəmə alimon hiç vırədə istinad kardedənin. Haliyədə vəziyyət jıqoe ki, tojə rektori bə vəzifə təyin kardəcəğin əv ıştə əvlodon qırd kardedə bəştə sə, universiteti əsasə vəzifəon dodə bə çəvon ixtiyar. İ kəs çeyku xəbə sedəni ki, ım odəmon kom akkreditasiyaku dəvardən ki, omən ali təhsilə muəssisə elmi məğaminə vəzifəon qətm kardəşone. Respublikadə 27 qılə universitet muəllim hozo kardedə. Əmo çəvon vadoə məzunon bə ko ğəbul be ro Təhsilə Vəzarəti təyin kardə imtahanonku dəvarde zınedənin. Çunki həmonə Universiteton ım kadron de lozimi zınəyon təmin kardedənin. Yəni əyo tədrisi səviyyə xeyli saruy.”
İmiən ğeyd karde vacibe ki, keşvəri co sahonədə vəziyyət çokneyebi, çey elm və təhsili sahədən jəqo bənine, co cur bıe nibəzıne.
İbrimi Zahirəddin. Çe Rusiya Yekaterinburğ şəhəriku, İİR sədo, tolışi radio.
