Az.R-ədə benzini ğıyməti boho bıe səbəb çiçe.

Azərbaycanə Respublikadə sutemoni ğıymət ımsori yanvarə manqədə de miyonə hisobi 20% boho kardəşonbe.

Isət çe iyunə manqi 2-minə rujiku Aİ-95- Premum benzini ğıymət çe 1 mənot 25 kopikiku tosə 1 mənot 40 kopiki, Aİ-98- Super benzini ğıymət isə 1 mənot 40 kopikiku tosə 1 mənot 55 kopiki ros bıə.

SOCAR-i de ictimaiyəti əlağə şebə rəisi muavini ım fakt de dınyo vıjorədə nat və natə məhsulon ğıyməti boho bıe izah kardəşe, həmən votəşe ki, ım markaninə benzini çəmə keşvərədə istehsalış ni, bı səbəbən idxali məhsule və ğıymətşən çe xarici ğıymətonku jidastie. Im benzinon əsasən çe Rusiya və Rumıniyaku bə məmləkət idxal bedə.

İğtisadşunas Natiğ Cəfərli ım məsələ jıqo izah kardedə ki, bı rujonədə dınyo vıjoronədə nati ğıymət bə 70 dollari rəsə, əmo ım, bə benzini ğıyməti 2 manqi bədiqə təsir nişon doe bəzıne. Cəfərli jıqo boho kardə əməli səbəbi monopolistonku vindedə. Ey bə Meydan TV votəşe ki, bə məmləkət barzə oktaninə premum və super benzinon iqlə  SOCAR-i şirkəton vardedən, əvonən daxili həvatə ğıyməti bəştə mənafe muvafiğ çanədə pidəşone anədən nodən. Ço keşvəronədə, məsələn Qurcistonədə monopoliya ni, muxtəlifə şirkəton ım benzinon bə məmləkət idxal karde səbəbiku, çəvrey sutemon həvatə kolonkaonədə ım benzinon ğıymətonən fərğinin. Azərbaycanədə isə salemə rəğabətə muhit ni, sutemoni ğıymətonən har vırədə eyniey. İğtisadşunasi ımən ğeyd kardəşe ki, ım benzinon boho karde bə iştisadiyyati təsirış nibəbe. Çunki premumə benzinon iğtisadiyyatədə istifadə bedəni, iqlə ərbobə odəmon, bohoə avromobil roməkəson çəvonədə istifadə kardedən. Əvonən jıqo bohoçiəti bəştə cifon təsirədə hiss bəkarden.

İbrimi Zahirəddin. Çe Rusiya Yekaterinburğ şəhəriku, İİR sədo, tolışi radio.