Az.R-ədə di təsərrufat tənəzzul kardedə

Prezident İlham Əliyev keşvərədə bə di təsərrufati inkişafi məxsusi diğğət nişon dodə

Bı məsələ dair muşavirəon dəvunidə, proqramon ğəbul kardedə, xeyli miğdarədə devlətə vəsaiton bənə subsidiya bo hırdə fermerə təsərrufati inkişafi ro co kardedə. Əmo bə keşvər idxal bıə ərzağə məhsulon miğdar sorbəsor vey bedə, ımən ey nişon dodə ki, devlət ıştə əhali de  ərzaği təchizatədə şe-şe çe idxaliku bə jidasti vəziyyət eqınidə.

Ovqat.com sayt məlumat dodə ki, prezident Əliyevi bə Az.Tv doə musahibədə ğeyd kardəşe ki, hokuməti di təsərrufati sahədə 50 qılə aqropark onoe məğsəd hestışe, bımi ro 2 milyard mənot vəsait co kardə bıə. Im aqroparkon veyni ıştə fəaliyyət bino kardəşone. Prezidenti həmən votəşe ki, aqroparkon onoe di təsərufatədə şə islahaton əsasə hissəy, bımədə məğsəd çe əhali ğida əmniyyəti təmin kardeye.

Çe Respublika Devlətə Statisika Komitə bə ımsori iminə çətvəri dair elan kardə hesabatiku oşko bedə ki, 2021-minə sori sıftənə 4 manqədə bə ponə sori muvafiğ devri nisbətən bə məmləkət qandımi idxal 13 faiz , ğəndi idxal 4 faiz, beməyə ruəni idxal 48 faiz, sesəkə ruəni idxal  5 faiz, tərəvəzi idxal 2 kərə, yəni 100 faiz vey bıə.

Bə di təsərrufati dair ekspert Vahid Məhərrəmli bo Meydan TV qəp jəşe ki, məmləkəti ğida təminatədə sorbəsor çe idxaliku bə jidasti vəziyyət eqənie hokuməti bardə “bınəynə islahat”, “mudrikə və diərovində siyasəti” acizanə nəticəy. İştənən çe Devlətə Statistika Komitə qandımi idxali nişon doə 13 faiz real rəğəmisə xeyli kame, həğiğətədə isə ım rəğəm bə 30 faizi bərobəre. Bə məmləkət idxal bıə nunə məmulaton miğdar bə 70 faiz rəsə. Məhərrəmli ımən bə yod vardəşe ki, de Parlamenti ımsornə fevralə manqi 23-də ğəbul kardə təşəbbusi 3 sori muddətədə bə keşvər idxal bıə qandım, həm kemrukə rusumiku, həmən çe əlavə dəyər verqiku azad kardəşone.

İbrimi Zahirəddin. Çe Rusiya Yekaterinburğ şəhəriku, İİR sədo, tolışi radio.