Vıjoronədə xətomandə məhsulon hestin

Həvo qam bıe vıjoronədə ğida- əsasən qobələk, moy, qujdə məhsulon xərob bıe ro şərait bə əməl vardedə

Bı səbəbən ojə həvoədə ğida məhsulon həvatəkəson bəpe əvoni mutləğ pepuşton, həmən çəvon səpe istehsal bıə tarix, bə vəc omə muddət və istehsal kardə firma nom mutləğ ğeyd bənine. Im sıxanon bə “axar.az” sayti Ozodə İstehlakçion İbemoni sədr Eyyub Nuseynovi votəşe. Həmən ğeyd kardəşe ki, məhsul istehsal kardə har qıley, hətto fiziki şəxs bəpe Ğida Əmniyyəti Aqentiyyətiku çe ğeydiyyato qəvardo.

“Sputnik Azərbaycan” saytiən keşvəri vıjoronədə mevcud vəziyyəti həxədə de Eyyub Huseynovi tasıb bardəşe. Ey çe muxbiri muxtəlifə mevzuonədə doə parson cəvobədə izah kardəşe ki, orəxnə soronədə keşvərədə kali mərəzonku vəfot kardə odəmon miğdari ziyod bıe səbəb əsasən ğida məhsulon befərə keyfiyyətədə beyədəy.  Haliyədə vıjoronədə tərkibədə nitriti miğdar normaku xeyli vey bıə məhsulon hestin. Ey ıştən paytaxti mərkəzi vıjoronədə kali tərəvəzon ekspertizasiyaku dəvuniəşe, çəvon tərkibədə nitriton miğdar çe həddo xeyli ziyod beşə.

Huseynov bə Qenış Modifikasiya Bıə, yəni QMO məhsulonən pexəvə. Votəşe ki, diə məkəmon ki, rəsmi dairəon respublikadə QMO məhsulon perosnie fakti inkar kardedən, vıjoronədə bə jəqo məhsulon kafi ğədər rast ome mumkune. Qirəm ə tərəvəz, və ya mivədə donə nibu, bızın ki, əv QMO mənşənine. Jəqo beməyətumon həvate ey istehsal kardə korporasiyon inhisarədəy. Umumdınyo Ticarətə Təşkilatən bə QMO məhsulon perosnie tərəfdare. Azərbaycan hələ ki, bə ım təşkilati uzv beku okıridə. Əmo keşvəri di təsərrufatədə QMO mənşəninə beməyon perosniə fakton hiçən kam ni. Im koy tərəfdaron ıştə mevğe jıqo əsasin kardedən ki, QMO məhsulon bəşəriyyəti çe vəşiyətiku xilas kardedə. Səroste ki, dınyo kali devlət və reqiononədə vəşiyəti ehtimal vey barze, əmo Azərbaycani jıqo xəto təhdid nıkarde qorə keşvəri dionədə bə QMO məhsulon perosnie ehtiyac ni.

İbrimi Zahirəddin, çe Rusiya Yekaterinburğ şəhərku. İİR sədo, tolışi radio.