Polison bə narkotikə ticarəti əleyh mubarizə bardə dini fəal dastqir kardışone

“Mısılmonon İbemonə Hərəkati” uzv Humbətov Razi İyulə manqi 7-ədə polison tərəfo dastqir bıə

Çey jimon kardə Ceyranbatan ğəsəbədə mulki olətinə 5-6 nəfər şəxs bə çey daston ğandalşon jə, nışandəşone bə maşin, bə naməlimə istiğamət bardəşone. 2 ruji bədiğə məlum bıə ki, Hummətov Daxili Koon Vəzarəti de Mutəşəkkilə Cinayəton Mubarizə İdarədə, yəni xalğı arədə “Bandotdel” votəynə şebədə oğətedən. Im xəbə bə Meydan TV “Mudafiə Xətt” nominə bəşəri huğuğon təşkilati səvon Rufət Səfərovi dəvuniəşe. Həmən votəşe ki, bə Hummətovi işqəncə doe barədən məlumaton hestin, çe Ombudsmaniku, Beynəlxalğə Səlibe Sorxi Boku numayəndəku xahiş kardəşone ki, ım məsələ ıştə diğğətədə oqəton.

Vəkil Cavad Cavadoviən Razi Hummətovi  “Bandotdel”ədə oqəte fakt təsdiğ kardəşe. Votəşe ki, bə çey əleyh de narkotikə ticarəti məşğul bıe maddə ittiham bə nav doəşone. Im maddədə bo mığəssiron 5 soriku tosə 12 sori zindonə cəzo nəzərədə qətə bedə.  Nərimanov rayoni məhkəmə bo çey istintaği ro ey 4 manqi muddətədə zindonədə oğəte həxədə ğəror doəşe. Vəkili ımən ğeyd kardəşe ki, hələ de Hummətovi vindemon karde mumkun bıə ni. Fikir hestışe ki, çey huğuğon darışte, bə çey ailə uzvon xəbə nıdoe, ey niyoəkle dastqir karde və polison həniən co  ğeyri-ğanuniə hərəkəton barədə apelyasiya şikayəti bıdo.

“Mısılmonon İbemonə hərəkati” rəhbəriyyətiku bə Meydan TV votəşone ki, Razi Hummətov bə narkotiki əleyh aktiv mubarizə bardə cıvonono qıleye. Çey, bə cinayətə məsuliyyət cəlb karde səbəb ıme ki, əv sosialə şəbəkəonədə hokuməti siyasəti sərt tənğid kardedəbe, dastqir bıeku bə nav ıştə statusədə nıvıştəşbe ki, “İlham Əliyev, xalğı tınış pidəni”. Qımon heste ki, Razi bə məhbəs dəğande səbəbən hejo çey jıqo radikalə mubarizə bardeye.

Daxili Koon Vəzarəti de ım fakti əlağədar məlumat pevolo kardəş ni.

İbrimi Zahirəddin. Çe Rusiya Yekaterinburğ şəhəriku, İİR sədo, tolışi radio.