Çe Yardımlı rayoni əjion ğazə problem.

Bə rəsmi məlumaton əsasən hamsuə Ermənistoni məntəğəon bə 100 faizi nezi de ğazi təchiz bıən. Qurcistoni hokuməti, keşvəri məntəğəon de ğazi təchizati tosə 2022-minə sori bə 90 faiz rosnie plan hestışe

Jıqo vəziyyətədə  Az.R hokumətiən rəsmən elan kardəşe ki, bə məmləkəti jimonə məntəğəon 95 faizi ğaz okırniə bıə. Əmo bə rayonə dion vəziyyəti nəzər səğandeədə məlum bedə ki, bı sahədə xeyli noğsan və nırəsəyon hestin.

Yardımlı rayoni Bərcan diy sakinon bə İlham Əliyevi məktub vığandəşone, xahiş kardəşone ki, bə çəvon, həmən bə ətrofi dion ğaz okırnie barədə bə əlağədar təşkilaton dəstur bıdo. Im həmən Yardımlı rayoni əraziədə dəvom kardə ekoloji fəlakəti vəy bəse. “FED.az” sayti dərc kardə həmonə məktubədə votə bedə ki, rayoni dionədə ğaz nıbe səbəbiku əhali zımıstoni vaxti ıştə kəon tosbonie ro bo ezım tədaruk karde məcbur bedən. Imən har sor vişədə bə çand həzo doon  ance səbəb bedə. Diy sakinon bə ım cur vəziyyəti ekoloji terror nom noəşone. De dılədoji ğeyd kardəşone ki, çand sorone, vişəon kullən ğır kardə bedən, jıqo dəvom bıkardo, Yardımlı rayoni əhatə kardə , de nadir endemik beməyon qəncinə ım ekoloji landşaft bə daşt pebəqarde, ey həni bərpo karde mumkun nibəbe. Divojon ımən izah kardəşone ki, rayoni əhali 90 faiz dionədə jidə. Həmonə məntəğəon jolə ğism hələən de ğazi təchiz bıə ni. Diə məkəmon ki, Respublika rəhbəriyyət keşvərədə bo ekoloqiya muhafizə, vişə və havzə təbiəti bərpo karde ro çanədə budcə vəsaiton sərf kardedə, əmo rayonə dionədə ğazi nıbeku çəvonsə vey vişə massiv məhv kardedən. Bərcan diy sakinon ıştə məktubi orəxədə sənibəton Respublika prezidentiku xahiş kardəşone ki, jıqo ekoloji faciə vəy se ro bəştə məmuron dəstur bıdo.

Əvon ım muraciəti surət həmən bə İminə vitse-prezidenti, Milli Məclisi sədri və çe Yardımlı rayoni parlamentədə deputat Musa Ğuliyevi vığandəşone.

İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.