Çe Az.R jimonə məntəğəon çand faiz de ğazi təmin bıən?

Şəmkur rayoni “Varlı həyat” yəni “ərbobə jimon” nominə diy əhali çe dəvitəyono ibarəte, dəvardə əsri 90-minə soron İminə Ğərəboği çanqi nəticədə didərin eqıniən , omən bı diy dəvitən

Əvon bə “Sputnik Azərbaycan” sayti şikat kardəşone ki, tosə ısət bo əvon ğaz okırniəşon ni.  Çəvon votəyonku məlum bıə ki,  30 sore , çe hokumətiku bə çəvon diən ğaz okırnie xahiş kardedən. Bımi ro hətto i kərə Şəmkur – Bandə Cəyir şosse roədə piket dəvuniəşone, həmonə ro dəbastəşone. Əmo çəvon xahişı tosə ısət məsəkəs bıəni. Hərçənd ki, ğazə lulə çe diy 3 kilometriku dəvardedə. Ətrofi 7 diy 5 qılə de ğazi təmin bıə, 2 qılə diy camaat hələən ıştə məişətə problemon de hışkə sıl sute vasitə həll karde məcburiyyətədəy.

Bənə Az.R de nat və ğaz ehtiyaton qəncin bıə qıley məmləkətədə əhali ıştə kəy de ezım və hışkə sıl sute tosbınie bo hokuməti xəcolətvardə vəziyyəte. Respublika muxalifət etiraf kardedə ki, hamsuə Ermənistoni hokuməti bə keşvəri məntəğəon 100 faiz ğaz okırniəşe. Diə məkəmon ki, əvon ğazi çe xarico de valyuta hıridən. Boku hokumət isə ıştə məmləkətədə hasil bıə ım neməti bəştə xalği rosnie ro jıqo ocizəti nişon dodə. Həmən ki, ım hokuməti çe Ermənistonisə bə dumo nımande ro, elan kardəşe ki, bə Respublika jimonə məntəğəon 95 faizi ğaz okırniəşe. Əmo mevcud vəziyyət çımi əksi nişon dodə.

Dəvardə rujonədə Ekoloqiya və təbii sərvəton vəzarəti naziri muavin Vuğar Kərimonvi  elan kardışe ki,  Reqional Vişə Təsərrufati Mərkəzi 32 qılə rayoni 67 qılə vişəvonə ərazionədə  bo zımıstoni ezım tədaruki ro bə vişə ance icazə doəşone. Imən bey dəlalət kardedə ki, keşvəri məntəğəon 95 faiz ne, xeyli kam miğdar de ğazi təmin kardəşone. Muasir dınyoədə təbiiəti şe-şe kam bıe , ekoloqiya muhafizə karde zərurəti aktual bıe şəraitədə, de karbohidrat ehtiyaton qəncin bıə keşvəri ərazi niməyədə bə vişəon ance rəvoc doe Boku hokuməti ıştə məmləkəti çanədə kolhınd və besərıştə idarə karde nişon dodə.

İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.