Pambəvonə fermeron kom problemon hestışone.

Respublikadə de pambə qırd karde bino bıe əlağədar şirkəton pambə hıriə ğıyməton barədə ğəror ğəbul kardəşone ki, bə ponə sori nisbətədə har toni hıriə ğıyməti 50 mənot ziyod bıkon, demiən 1-minə sort pambə 1 toni ğıyməti bə 700 mənot, 2-minə sorti ğıyməti bə 680 mənot, 3-minə sorti bə 640 mənot, 4-minə sorti isə bə 600 mənot bırosnon

Sputnik Azərbaycan sayti muxbiri çe Beyləğan rayoni sakin, fermer Aydın Əliyevi bı məsələ munasibət omutəşe. Ey qəp jəşe ki, hokuməti sutemoni ğıyməti boho karde, çe fermeron xarcon məbləğşən vey karde. Dəvardə sori 1 hektar sahədə pambə perosnie xarc 1200 mənot be, ımsor bə 1800 mənot ros bıə. Im 50 mənot ki, ziyod kardəşone, çe həmonə 600 mənoti fərği çand faizi kompensasiya karde bəzıne?

Fermer Əli Allahyarovi çe qubrə və pestisidon ğıyməti şe-şe boho,  keyfiyyəti isə saru eqınieku şikat kardəşe, votəşe ki, ımən həm məhsuli moyə dəyəri boho kardedə, həmən har hektari məhsuldarəti bə ji eğandedə. Bı səbəbən devləti əlağədarə təşkilaron pestisid və qubrə istehsal kardə , həmən həvatə şirkəton fəaliyyəti bəpe daima nəzarəti jitono oqəto.

Fermeron ımən votəşone, 2018-minə sori Prezidenti fərman doşe ki, çe pambəvonon bə har hektari kəşə xarci 50 mənot bəvon oqırdıniə bıbo. Əmo tosə ısət əvon həmonə pul seşon zınəni, xahiş kardəşone ki, devləti sərdari doə fərmani içra təmin bıbo, həmən bə kimyəvi pereparaton keyfiyyəti  nəzarəti təşkil bıkardon.

Bə di təsərrufati dair ekspert Vahid Məhərrəmli fikir jıqoe ki, dınyo vıjorədə çe  təmizə pambə ğıymət 36 faiz ziyod bıə. Əmo Respublikadə pambə ğıyməti cəmi 50 mənot ziyod karde , infilyasiya nəticədə fermron ziyod bıə xarcon 7-9 faizi təşkil kardedə. Di Təsərrufati Vəzarət ım 50 mənoti bənə Prezident Əliyevi bə pambəvonon nişon doə  ehtirami bə ğələm dodə. Əslədə keşvəri vermeron bə oliqarxon həninən ərbob karde və çəvon sərvəti tikiən vey karde məhkum kardə bıən.

İbrimi Zahirəddin. Çe Rusiya Yekaterinburğ şəhəriku, İİR sədo, tolışi radio.