İroni universeti tələbəon tərəfo bə Azərbaycan Respublika anti islom siyasəton nışo doə reaksiya.

İ dastə çı İroni universiti tələbəon Tehronədə bıə Azərbaycan Respublika səfarətxotə vədə eteroz aksiya bərpo kardışone və ıştə ğəyzi iyən muxalifəti bə Boku hukuməti anti islom siyasəton nışoşon do.

Bandotteli məmuron tojədən çı məhbusə islamçion stintiğ cərəyonədə bə Xıdovənde xalıği sahət və vırə be ehtıromətəti kardey çərçivədə dıjmoniku istifodə kardışone ki Azərbaycan Respublika mısılmonə milləti norohəti iyən ğəyzi bois bıə.

Bə həminə xəbisə koy reaksiya nışo doe çərçivədə Azərbaycan Respublika məşhurə ruhani iyən ın kişvəri mısılmonon i bemon hərəkati lider Hoci Tale Bağırzodə dıştə vəşiyanəti aksiya vositə çı Bandotteli məmuron cəzo doe tələbış karde.

Əv ıştə ın vəşiyanəti aksiya nomi aksiya tosə şəhodət nom noəşe və elanış kardə ki tosə be ehtıromətiəkə amilon və məmuron cəzo doe zəmon bəştə vəşiyanəti aksiya dəvom bədoy.

Xəbə omə ki de ın aksiya həmzəman, bəzi co məhbusə dindorə islamçion həm ın koy bino kardəşone.

Zinə və de Azərbaycan Respublika mısılmonon i bemon hərəkati lideri vəşiyanəti aksiya 11 minnə ruji həmzəman, İronıjə universiti tələbəon Tehronədə bıə Azərbaycan Respublika səfarətxotə vədə eteroz aksiyaonədə çı Amerkə və israili boydəği otəşışon jə və Boku hukumətiku tələbışon be ki ıştə anti islom siyasətonədə ijən diyəş bıbu.

Eteroz aksiya oxoədə handə bəyoniə çərçivədə həm Hoci Tale Bağırzodə və dəy bə ico bıə co islamçiyə məhbuson ozodəti ijən Azərbaycan Respublika və sionist rejimi miyono əloğəonədə ijən diyə kardey tələb bıə.