Boku: Pelosi sıxənon, məntəğədə behronon şiddəti əlovə əkəy

Amerkə nımoyəndəon parlamenti yoli mıdoxilə icodəkə sıxənon reaksiyaədə, Azərbaycan Respublika xarıci vəzarətxonə təkidış karde: ım sıxənon nə ınki hiç foydəş ni, bəlkəm daveon əlovə kardedə.

Çand dahon bəbe ki Ğərəboği məsələ barədə Erməniston iyən Azərbaycan Respublika miyono dave iyən ixtilofe, və tosə bə ısət rabitəon normal kardey cəhəto 2tərəf miyono muzakirəon benəticə be.

Tojədən ım daveon cərəyonədə, Seşəmbə ruj Ermənistoni mudafiə vəzarətxonə iddeoş kardə ki nimə şəvi bəpeşt, Azərbaycan Respublika hərbiçion bə Ermənistoni marzi qədə şəhron səmt, de şiddətin surətədə otəş vığandışone.

Boku həm İrəvani bə həmləon binoəkə kişvər mıttəhəmış kardedə.

Qıləy holədə İron İslam Respublika iyən Rusiyə co qılə kişvəron mıdoxilə muğaisədə xususi Ğəfğazi məntəğəku xarıc bıə kişvəron barədə nota doəş iyən ım məsələ məntəğədə bıhroni əlovə kardey bois bıə.

Bə Əlməyadin raporti əsos, zinə Amerkə nımoyəndəon parlamenti yol Nansi Pelosi  sıxənon reaksiyaədə, Azərbaycan Respublika xarıci vəzarətxonə Boku iyən İrəvani miyono tojə marzon  barədə de qılə bəyoniyə vositə elanış karde: Azərbaycan Respublika iyən Ermənistoni daveon barədə, Pelosi sıxənon beədolətinə sıxənonin.

De Azərbaycan Respublika iyən Erməniston miyono daveon əlovə bey həmzəman, co kərə Nansi Pelosi qıləy mıdoxilə icodəkə və daveon əlovə kardey səfəri ğolibədə, bə İrəvan səfərış kardə.

Ermənistoni parlamentədə, Pelosi Azərbaycan Respublika həmləon məhlumış karde iyən de işorə bə ım ki de hərbi hərəkəton vositə ixtilafon məhv nıbun iddeoşş karde Amerkə, Ermənistonədə sulh iyən demokratiyaku bəştə himoyəon dəvom do və marzon əvəz beyro, də həmmə cəhdon vədə mobarizə kardedə.