Boku hərəkəton cərəyonədə, beynəlxalğə ictima sukutiku tənğidon

Bandiyə Ğərəboği məhəlli dıvlət, Laçin koridori Azərbaycan Respublika oxonə hərəkəton cərəyonədə, beynəlxalğə ictima bə çəvon sukuti xoto, ım məntəğədə oxonə hodisəon məsul zıneydə.

Milodi 2022 minnə sori Dekabrə manqi 12 minnə rujədə, Azərbaycan Respublika Erməniston-bandiyə Ğərəboği caddə, ki bə Laçin koridori məşhure işğalış kardə. Boku de ım hərəkəti vositə, 120 həzo nəfər bandiyə Ğərəboği sakin bıə kəson ıştə mıhosirədə ğərorış do və de ım şəxson de zərruriyə ehtiyocon kam bey əcumlə damon dim bə dim bıən.

De ım vucud ki bəşərdustə təşkilaton səmtiku notaon elan bıə əmmo Laçini koridori işğal bey həmçınan dəvom peydoş kardə. həminə şəroyetədə bandiyə Ğərəboği məhəlliyə dıvlət, beynəlxalğə ictimaiyəti sukutiku vey tənğidış kardə.

Bə Armen Peres məlumatərosnə mərkəzi raporti əsos, zinə İşəmbə rujədə, bandiyə Ğərəboği xarıci vəzarətxonə qıləy bəyoniyədə bəyonış karde:  bandiyə Ğərəboği zəmini roy de Erməniston və xarıc bıə dınyoro vey yeqanə roy,  Laçin koridor bə hisob omeydə. əv ijən əlovəş karde: Boku ım hərəkət Milodi 2020 minnə sori Noyabrə manqi 9 minnə ruji 3tərəfiyə bəyoniyə maddon oşko surəti darşiye bə hisob omeydə.

Bandiyə Ğərəboği məhəlliyə dıvləti xarıci vəzarətxonə ijən ım məntəğədə insoni faciə ney bey barədə notaş do və təsdiğış karde: həminə şəroyetədə beynəlxalğə ictimaiyəti izolasiya ğəbul kardənin ni, boşiki Azərbaycan Respublika rəsmi şəxson ıştə cinoyətkorə fəaliyəton dəvomiro, ım sukut bənə həmoşə sitoyeş zıneydən.

Bandiyə Ğərəboği xarıci vəzarətxonə beynəlxalğə ictimaku tələbış kardə ki bəştə təəhudi əsos, bəşər həxon himoyə kardey və qenisidi vəy qətey himoyə kardey cəhəto bəpe vey rə varid bıbun.

Im bəyoniyə əlovəş karde: Laçini koridori işğol bey dəvomi nəticədə, bandiyə Ğərəboğədə, zərruriyə məhsulon kam bey, damon, xorək və sutemoni kam bey əlovə bəbe.

Bandiyə Ğərəboği xarıci vəzarətxonə ımsornə sori Yanvari 9 minnə rujədə, bə Ğərəboği məntəğə Ermənistoni qazi ovoştoniyə xətton ğət bey və de caddə işğolçiyon vositə, Qoris-Stepanakreti zumandə ruşnə ovoştoniyə xətton ğət kardey işorəş karde iyən təsdiğış karde: Azərbaycan Respublika, bandiyə Ğərəboği de 120 həzo nəfər cəmiyət, insoniyə faciə astanədə ğərorış do.

Im bəyoniyədə omə ki bandiyə Ğərəboği mıhosirə, Milodi 2020 minnə sorədə Boku hərbi həmləon dəvomi zıneydə ki de Tırkiyə həmkoəti vositə əncom bıə. Im bəyoniyə ijən təkidış karde: be şək, Azərbaycan Respublika hərəkəton, Boku qenosid siyasəti dəvomi bə hisob omeydə.

Votey bəbe ki Boku, ekoloqiya tərəfdaron Laçin koridori işğoli amil zıneydə, əmmo bə İrəvani votəon əsos, Azərbaycan Respublika əmniyyəti və kəşfiyot sistemon və təşkilaton məmuron caddə işğalışon kardə.

Ermənistoni nəzəku, 2 qılə kişvəri təvafuğnomədə Laçin koridorədə ozodə şe-omey təsdiğ bıə və Boku de ım caddə işğalçiyəti vositə, sulh təvafuğnomə darşiyəşone.

Holi hazırədə, bandiyə Ğərəboğədə dəmon və səhiyyə imkanaton kam bey vey muhimmə niqəroni bə hisob omeydə. Laçin koridori işğolçiyəti tosə bə ısət, təğribən 15 nəfər bədholə noxəş de beynəlxalğə sıə hiloli təşkiloti vositəçiyəti ım məntəğəku bə Ermənistoni noxəşxonə ovoştoniyə bıən.