Boku: Laçin caddədə nəzorət mərkəzi icod kardey lozıme
Mar 13, 2023 06:47 Asia/Tehran
Azərbaycan Respublika mudafiə vəzarətxonə de məntəğədə Ermənistoni hərbi iddio kardey vositə elanış karde: Laçin caddədə marzi nəzorət kardey mərkəz icod bey lozime.
Milodi 2022 minnə sori Dekabrə manqi 12 minnə rujədə, Azərbaycan Respublika Laçin koridori dəbastey binoş kardə, və bandiyə Ğərəboği bəştə mıhosirəş qətə. de ım vucud ki insondustə təşkilaton vey kərə bə Ğərəboği milləti coni təhdid bey xoto, notaşon do, əmmo Boku rozi nıbıə ki ım caddə oj bıko.
Bə Fars aqentiyəti raporti əsos, ki Azərtaciku nəğlış kardə tojədən Azərbaycan Respublika mudafiə vəzarətxonə, iddioş kardə ki Xankəndi royədə, Ermənistoni silohinə ğıvvon hərbi maşinon de Rusiyə sulh mərominə ğıvvon həmroəti vindey bıə.
Im vəzorətxonə ıştə bəyoniyədə vvardəşe: əmə elan kardedəmon ki bə Ğərəboği məntəğə Ermənistoniku hərbi şələon kırniye vey rə bəpe mıtəvəğif bıbu və Erməni silohinə vahidon bəpe vey rə be siloh kardey zəmonədə Azərbaycan Respublika sərzəminiku xarıc bıbun.
Azərbaycan Respublika mudafiə vəzarətxonə həmçınin bəştə tojə iddio təvəssul iyən əlovəş karde: jığo tərtibinə ğeyri ğanuniyə fəaliyəton de Ermənistoni marzədə Laçin koridori caddə oxoədə ım kişvəri marzi nəzorəti mərkəz və koridori icod kardey zərrurəti nışoş do.