Ğəzzədə sionist rejimi cinoyəton məhkum kardeyədə Tırkiyə milləti aksiya bərpo kardey dəvom
Tırkiyə millət co kərə de aksiya bərpo kardey, Ğəzzə tanqədə sionist rejimi cinoyəton məhkum kardışone.
Oktiyabrə manqi 7minnə rujədə Fələstini muğaviməti qrupon sionist rejimi şərrə koon cəvobədə, işğol bıə sərzəminonədə həmmə curnə iyən mislış nıbıə əməliyoton bino kardışone ki işğolçiyon 75 sornə omrədə mislış nıbe.
Bə Ğəzzə tanqə jimoni vırəon sionist rejimi vəhşiyə həmləon bə 4 minnə befosilə haftə varid bıə iyən bə Fələstini səhiyyə vəzorətxonə elani əsos, tosə ısət təğribən 9 həzo Fələstinıjon şəhid bıə ki ım miğdoriku nimə məzlum və be mçudafiə hırdənonin.
Bə Əlcəzirə televeziya kanali raporti əsos, ımruj Cımə Tırkiyə millət İstanbul şəhrədə de aksiya bərpo kardey bə Ğəzzə tanqə sionist rejimi ərtışi həmləon oqətey tələb kardışone.
Aksiya bərpo kardə kəson de bə Amerkə iyən İsraili ələyh şuar doey, sionist rejimiku ım kişvəri himoyəon məhkumış kardən.
Çand ruj çımiku bənav həm İstanbuli millət de bə sionist rejimi ələyh aksiya bərpo kardey Fələstin iyən muğaviməti millətiku ıştə himoyəon elan kardə bin.
