Kermani terroristiyə hodisə dumoədə, Uzbəkistoni prezdent iyən Tırkmənistoni rəhbər de İroni devlət və millət ıştə hamdardi nışo doşone
Uzbəkiston iyən Tırkmənistoni prezdenton cobəco mesajon ğolibədə bə İroni millət və devlət, Kermani teroristiyə hodisə təsliyət votışone.
Dey manqi 13 minnə rujədə, İslomi İnğilobi Sepah təşkilati Ğuds ğıvvə nakonə komandir Qeneral Ğasım Suleymani şəhodəti 4minnə sorəqardışi mərosimədə və bə İroni cənub, Kermani Qolzare Şuhəda rəsey royədə, ım mərosimi zayiron miyonədə 2 qılə terroristiyə tepımon əncom bıə ki bois bıə 89 nəfər şəhid və 284 nəfər həm zəxmin bıbun.
Pencşəmbə rujədə DAEŞ terroristiyə qədə qrup, de qıləy byoniyə muntəşir kardey İroni cənubədə terroristiyə cinoyəti məsuliyəti ohdəş qətə.
Bə Tele-Rədio aqentiyəti raporti əsos, Ozbəkistoni prezdent, Mirzayev qıləy mesajədə, Kermani şəhrədə dəhşətinə hərəkətədə İroni veyə milləti kıştey və zəxmin bey bə İroni millət və devlət iyən bə ım hodisə ğıbon bıə ailəyon təsliyət votışe.
Tırkəmənistoni Rəhbər ĞorbanĞoli Bırdi Muhəmmədev həm qıləy mesajədə Kermanədə terroristiyə hodisə bə İslomi İnğilobi Yolə Rəhbər Həzrəte Ayətullah Xamenei iyən İroni İslomi Respublika prezdent təsliyət votışe və de ım hodisə ğıbonion ailə ıştə hamdardiş elon kardə.
Kermani tepımoni hodisə və İroni veyə milləti şəhodəti dumoədə, dınyoədə veyə kişvəron de mesajon vığandey vositə, ım həmləon məhkum və de ğıbonion ayləon iyən İroni millət və devlət ıştən hamdardi elon kardışone..
