Beynəlxalğə Ğudsi Ruj
Rujəmoə manqi orəxnə cımmə ruj dınyo miğyasədə islami cəmiyyəti tərəfo bənə "Beynəlxalğə Ğudsi Ruj"i ğeyd kardə bedə. Im, dınyoədə bə zulm və nohəxi əleyh mubarizədə məzlumə insonon vəhdəti ruje.
Azərbaycani İslamə Partiya sədri əvəz Haci İlham Əliyevi bə "Maide.az" sayti votəşe ki, çe ım siyasi hərəkəti binovrə Ayətullah Xomeyni (r.ə) noəşe. Im ruj Bə Beytul-Muğəddəsi - bə İslami sıftənə ğıbilə sionist rejimi tərəfo işğali etiraz kardə ruje. "Ğudsi Ruji" mahiyyəti dərk kardə insonon miğdar sorbəsor həniən vey bedə, dınyo miğyasədə çəvon sədo həniən barz omedə.
AİP iyuni 23-minə ruji - yəni Rəməzonə manqi orəxnə cımmə Bokuədə de "Ğudsi Ruji" əlağədar ıştə tədbir de Şəhidon xiyabani ziyarəti binoş karde. "Əbədi məşəl"i tono votemonon bəpeştə tədbiri ğətnamə bəyon kardışone, bə zulmkar rejimon əleyh mubarizədə bə şəhidə mısılmonon ruhi dıvo handışone.
"Nur.az.com" xəbə dodə ki, bı rujədə Bokuədə İsraili səfarəti vədə tosə 50 nəfər imoninə odəmi de "Bə İsraili - marde", "Bə Ğudsi -azadi" şuaron etirazə aksiya təşkil kardəşone. Çəvonədə təğribən 30 nəfər polison tərəfo dəstqir kardə bıən.
Bokuədə həmən de İİR Az.R səfarəti Mədəniyyətə Mərkəzi təşəbbusi "Beynəlxalqə Ğudsi Ruj və bə işğalqəron əleyh islamə dınyo həmrayəti" mevzuədə tədbir dəvuniəşone. Əyo çe keşvəri siyasətşunas, publisist, ədib və şairon iştirak və votemononşon bıə. İİR səfir Cavad Cahanqirzadə "Ğudsi Ruji" ənənon muhafizə, həmən çəmə arədə vəhdəti zəruri be votışe.
Beynəlxalğə Ğudsi Ruj dınyo diqər məntəğonədən - İİR, Rusiya,Turkiyə, Suriya, İraq və həniən co məmləkəton şəhər və dionədə de əzəməti ğeyd kardışone.
