Apellyasiya məhkəmədə mərəşulə eqıniə
İyulə manqi 20-minə ruji Boku Apellyasiya Məhəkəmədə Taleh Bağırzadə və çey həmməsləkon şikayəti dair məhkəmə iclas dəvom kardışe.
Bə ım koy hakim Əmir Bayramov sədrəti kardedəbe. Vəkilon ilkin məhkəmədə obyektiv ğərar ğəbul nıbe barədə çand qılə vəsadət ım məhkəmən ğəbul nıkardışe. Hakim bə məhbuson ıştə fikri vote imkan dodənıbe. Çəvon sıxanon nimədə oğətedəbe. Im bə məhkəmədə iştirakəkon etirazi səbəb be. Fasilə bəpeştə hakimi həni bə muttəhimon votemon karde inkan nıdoe məhbuson çe hovsələku bekardışe, əvon ıştə ovə butılkon, həmən məşo və səndəlon bə hakimi ğadəşone. Jıqo vəziyyətədə məhkəməşon muvəğğəti bə təxir eğandə. Məhkəmə zal tey kardəbəpeşt hakimon bə zal oqardən ıştə ğərar elan kardəşone, çe Boku Qonə Cinayəton Məhkəmə ğəror ğuvvədə oqətəşone.
Azərbaycani İslamə Partiya Sər Məclisi iclasi barədə "Nur-az.com" sayti nıvıştəşe. Partiya sədri əvəz Hacı İlham Əliyevi votəşe ki, Doktor Mevsum Səmədovi 3 sor muddətədə sərpuşinə zindonədə oqəte barədə məhkəmə doə ğəror çe hokuməti navo hozo kardə ssenari be. De ım roy çey zindoni məhbuson arədə nifuzi ziyod be və seşe.
"İslamazəri" saytən xəbə dodə ki, de Zığ ğəsəbədə " Əli ğədəmqah" ocəği ğeydiyyati ləğv be barədə Dini Təşkilaton Dair Devlətə Komitə bə "Sputnik Azərbaycan"i votəşe ki, bə çımi dair hiç qıley sənəd bə çəvon komitə daxil bıə ni. Jiqo qıley xəbə i qılə "Xalq" rujnomədə dərc bıə.
