Boku hokumət de rışvəxoron mübarizə bardedəni
Məlum qıley həğiğəte ki, har çəmiyyətədə rışvəxorəti fakton bedən. Az.R -ədən jıqo fakton kafi ğədər hestin. Respublika mass-media müntəzəm bı barədə xəbə dodə. Əmo Azərbaycani devləti co devlətonsə bı problimədə qıley əsasinə fərğ hestışe. Əqər co cəmiyyətonədə çəvırey devləton de rışvəxorəti müntəzəm mübarizə bardedənbu, Azərbaycani hokumət isə de ım ictimai bəlo mübarizə barde ro hiç qıley əzm nişon dodəni.
Məsələn, "Nur.az.com" nıvıştedə ki,Cəlilabad rayoni Xəlilabad di sakin Məmmədov Mahir bə məmləkəti Prezidenti və digər əlağədar orğanon müraciət kardəşe ki, çey zoə Məmmədov Yusif movardo şanqoney vindedəni, yəni şəvkuə noxəşine. Bı həxədə Respublika Oftalmaloqiya Mərkəzi arayışən heste. Əmo rayoni hərbi komissar Həsrət İsmayılov ceyku 1000 mənot rışvə tələb kardedə ki, im əlilə fərzəndi bə ərteş səfərbər nıko. Iyo rışvəxorəti fakti barədə konkret şikayət heste. Əmo Cəlilabad rayoni hüğuğ mühafizə orqanin hiç qıley - nə prokuror, nə məhkəmə, nə polis, nəən xüsusi xidməti idarə bımı tədbir vindedənin.
Bə Masalu rayoni polis şebə qıley tojə rəis vığandəşone. "Politika.az" sayt xəbə dodə ki, əv oməcəğin roy kəno de hırdə ticarəti məşğul bə odəmonku har həftədə 5 mənot pul tələb kardəşe. Rayoni əlağədar təşkilaton, əlbəttə ki, bə polis rəisi ım ğeyri-ğanuni zorakiə əməli ıştə çəşon vi kardəşone.
Boku Xətai rayoni 116 numrəninə məktəbədə valideynonku mütəmadi de müxtəlif vonəon pul tələb kardedən. "Azadlıq.info" ım fakti barədə məğalə nıvıştəşe, əyo konkret şikayətçi, rışvəxorə müəllim və direktori nomon nişon dodə. Əmo iyoən devləti hiç qıley vəsilə bı rışvəxorə əməli əncom kəşedəni.
Az.R -ədə məmuron əhaliku oşko pışvə tələb karde, hokuməti de ım cinayəti mübarizə nıbarde sübut kardedə ki, rışvəxorəti Boku hokuməti daxili siyasəti əsas istiğamətonədə qıleyebən.
İbrimi Zahirəddin.
