Avropa Şura məruzəçion de siyasi məhbuson vindemon kardəşone
AŞPA Monitorinq Komitə bə Azərbaycani dair həmməruzəçion Stefan Şennak və Sezar Florin Preda zindononədə de Taleh Bağırzadə, Abbas Huseyni, Fuad Ğəhrəmanlı, jurnalist Əziz Orucovi, bloqqer Mehman Huseynovi və həniən de diqər 3 nəfər məhbusi vindemon kardəşone.
"Azadlıq.info" nıvıştedə ki, Stefan Şennaki ım məlumat pevolo kardəşe, həmən votəşe ki, əvon Ğobustanədə de 5 nəfər məhbusi didor kardəşone, ım zindoni şəraiti bo hiç kəsi rəvo zınedəni, ey nezə vaxtonədə dəbaste məsləhəte.
Mısılmonon İbemonə Hərəkati zindonədə de bə Abbas Huseyni jimoni təhdidi əlağədar bəyonat doəşe. Çe əlağədar təşkilatonku tələb kardəşe ki, bə Abbasi jıqo təhdidon orəx doe ro lazımi tədbiron bıvindon. Vəkil Yalçin İmanoviən votəşe ki, de ım problemi əlağədar hələ 1 manq bə hav bə Ombudsman Aparati şikayət kardəşe, əmo tosə ısət çəvonku cəvob ni.
Respublika Ombudsman Aparati həmkar Rəşid Rumzadə bə Azadi Radio məlumat doəşe ki, de Abbas Huseyni vindemon kardəşone, çey şikayəton məsəşone, bı barədə bə Sər Prokurotura və Penitensiar Xidməti məktub vığandəşone. Çəvonku cəvob se bəpeşt bə vəkili şikayəti cəvob bədon.
Sentyabri 19-ədə Mısılmonon İbemonə Hərəkati uzv Əhsən Nuruzadə təkrarən dızdiəşone. Əvşon iminə kərə yanvari 24-ədə dızdiəşonbe. Bəvədə vəkil Yalçin İmanovi bə Respublika huğuğ muhafizə orğanon, hətto bə Mehriban Əliyeva muraciəti bəpeştə 1 həftə bədiqə məlum bəbıe ki, Nuruzadə "Bandotdeli" dəstqir kardəşe və məhkəmə bey 10 sutkəninə zindonə cəzo bıriəşe. Isət həmonə hadisə təkrar bıə. Vəkili Huruzadə peydo karde cəhdon hələ ki, nəticə doə nişe.
