Az.R-ədə barzə infilyasiya dəvom kardedə

Az.R Devlətə Statistika Komitə bə ımsornə 9 manqi dair məmləkətədə istehlak ğıyməton dinamika barədə məlumaton elan kardəşe. Məlum bə ki, bə ponə sori nisbətədə məmləkəti vıjoronədə ərzaği ğıymət 17,9%, ğeyri-ərzaği ğıymət 12,5% boho bıə. Xidməti sahədən ğıyməton 9,6% ros bıə.

İğtisadşunas-ekspert Natiğ Cəfərli bə "a24.az" sayti votəşe ki, çimi bəpeştən ərzaği ğıyməton boho bıe dəvom bəkarde. Tosə dekabrə manqi əvvəli çəş kardə bedə ki, qujdi ğıymət 10 -15%-ən ziyod bıbo. Nuə sori ərəfədə ərzaği ğiyməton boho bıe ənəvi qıley hole. Im sor məmləkətədə hışkə aləfi boho bıe, bo şıtə məhsulon ğıyməti boho bıe ro obyektiv şərait bə əməl vardedə.

Orəxnə soronədə devlətə budcədə mutəmadi nırəsəyon mevcud bıe səbəbiku budcə təşkilatə həmkaron məvacib və pensiyaneron pensiya indeksasiya nıbe, əhali quzərani qıvonin kardedə, həmən çəvon xıridarəti səviyyə saru eğandedə.  Jıqo vəziyyətən məmləkətədə ticari devriyyə bə kam kardedə, çimi nəticədə bə budcə daxil bıə vəsaiti miğdarən bə kam, budcə nırəsəy tikiən vey bedə.