Boku hokumət bə dini və siyasi fəalon divon qətedə

Az. R-ədə iğtisadi behrani dəvom çe əhali quzərani həniən qıvonin kardedə. Hokuməti bardə kolhındə iğtisadi, həmən repressivə siyasəti nəticədə əhali arədə noroziəti rujbəruj tikiən ziyod bedə. Tasua və Aşura əzadarəti mərasimonədə, çe muxalifəti dəvuniə etirazə mitinğonədə camaati kutləvi iştiraki hokumət bə təşviş dənoəşe.

Əv şəhrıvandon siyasi fəaliyyəti vəy se ro bə dini və siyasi aktivon divon qətə əməlon dəvom kardedə. Bə dini fəal Əhsən Nuruzadə de şər maddə cinayətə ko bino kardə bəpeşt, polisi tərəfo Mısılmonon İbemonə Hərəkati qıleyən uzv - Əbdulxalığ Cəfərli Sumğayit şəhəri polisi tərəfo dəstqir bıə. Eyən vote lozime ki, orəxnə həftonədə çe ım Hərəkati 4 nəfər uzv bə zindon dənoəşone. Çəvonədə Rəvan İsmayılov və Samir Babayevi məhkəmədə votəşone ki, Sabunçi rayoni polisə idarədə bəvon de elektriki işqəncə doəşone. Qəncə şəhəri dini fəalonədən bə 4 nəfəri munasibətədə cinayətə ko bino kardə bıə. 

Oktyabri 7-minə ruji mitinği ərəfədə 6 nəfər siyasi fəal polison tərəfo bə zindon dənoəşonbe, çand kəsən çe koyku beğanəşonbe. Meydan TV çe hokuməti ım ğeyri-ğanuniə hərəkəton dəvom karde barədə xəbə dodə. Şirvan şəhərədə AXCP 2 nəfər fəal - Abdullayev Əlifağa bə 10, Səmədov Eldəniz isə bə 15 sutka zindonə cəzo məhkum kardəşone.

Muxalifəti mitinğonədə iştirak karde səbəbiku poçtalyon Mehriban Huseynli, Boku şəhəri təcili tibbi komək stansiya həkim Həsrət Rustəmov, Ağsu rayon Kommunal Təsərrufati İdarə həmkar Mirdaməd Həsənov, İğtisad Universiteti dosent Eldar Huseynov, tibbi muəssisə həkim Elmi Usubov mitinğonədə iştirak karde səbəbiku çe koyku tojniəşone.