AŞPA bə Boku hokuməti siyasəti əleyh 2 qılə ğətnomə ğəbul kardəşe

Oktyabrə manqi 11-minə ruji AŞPA-də Az.R-ədə bəşəri huğuğ və azadion vəziyyət, siyasi repressiyon, təğibon, hokuməti bə demokratik prinsipon riayət nıkarde barədə muzakiron bə orəx rəse.

Çimi bə nav ım Assambleya numyəndon bə Boku səfərədə de prezident Əliyevi vindemon kardışone. Bı didorədə Əliyevi bəvon votışe ki, çey məmləkətədə siyasi məhbus ni, polison ıştənbəsəti, bə şəhrıvandon divon qəte barədə votəyon həğiğət ni, mılxəs ıştə usuli-idarə bə avropavojon bənə mutərəğği, insonpərvər qıley onoemoni təğdim kardışe. Əmo ısət məlum bedə ki,  Avropa numayəndon bə   çey votəyon bovə kardəşon ni. Çunki ım muzakironədə bə Boku hokuməti antidemokratik siyasəti dair 2 qılə ğətnomə ğəbul kardışone.

İminə "Azərbaycanədə demokratik təşkilaton fəaliyyət" nominə hesabatədə iyo bə Avropa standarton muvafiğ məhkəmə və ədliyyə sistemi nıbe, azadfikrinə odəmon siyasi səbəbonku bə zindon dənoe, Avropa Bəşəri Huğuğon Məhkəmə İlğar Məmmədovi barədə doə ğərari Azərbaycan hokuməti tərəfo icra nıbe, siyasi fəalon təğib bıe barədə ğeydon hestin.  Assambleya deputaton ım hesabat de 117 nəfər tərəfdar, 18 nəfər əleyhdarə sədo ğəbul kardışone.

Dıminə hesabat Azərbaycani bə Avropa Şura sədrəti devrədə bə bəşəri huğuğon riayət karde sahədə vində tədbiron həxədə bıe. Bi istiğamətədən deputaton Boku hokuməti bə irtica tərəf xeyli tənəzzul karde bə ğeyd seşone. Azərbaycani numayəndon bə ğətnamə layihon kardə təklifon hiç qıley ğəbul nıbin. AŞPA numayəndon 114 nəfər bə ım ğətnamə tərəfdar bin, 24 nəfəri əleyh sədo doşe, 14 nəfər isə betərəf mande.