Az.R-ədə iğtisadi tənəzzul dəvom kardedə

Boku hokuməti rəsmiyon daima məmləkətədə iğtisadi islahaton nəticədə bə dast omə muvəffəğiyyəton, inkişaf və tərəğğion barədə qəp jedən. Əmo ısət Respublikadə real vəziyyət jıqoe ki, əhali quzərani səviyyə sorbəsor bə ji eqınedə, inflyasiya har sor həniən vusət sedə.

Devlətə Statistika Komitə məlumat dodə ki, ımsornə 9 manqədə Umumdaxili Məhsul bə ponə sori nisbətədə 0,6% bə kam bıə. Maliyyə Vəzarəti elan kardə statistikadən votə bedə ki, bı 9 manqədə devlətə budcədə 738 milyon 600 həzo mənot nırəsəy bə əməl omə ki, ımən məmləkəti Umumdaxili Məhsuli 1,5%-i ğədəre.

Respublikadə iğtisadi behrani əsasə nışononədə qıley Naxçıvani Avtomobol Zavodi ıştə fəaliyyəti dəparçınie bıe. "Azadlıq.info" xəbə dodə ki, ımsori 9 manqədə zavodi cəmi 30 qılə avtomobil istehsal kardəşe. Avğustə manqədə cəmi 2 qılə, sentyabrədə 7 qılə maşin həvatə bıə. İsət zavodi amboədə 124 maşin ıştə mıştərion bə çəşe. İlham Əliyevi ponə bəştə naziron "Nazlifani" məhsuli se dəvəti hiç qıley effekt nıbeşe, hokuməti kolhındə siyasəti nəticə ım be ki, devləti dastəq doə ım sənaye muəssisə muflis bıe.

Əhali sosial vəziyyəti qıvonin bıeyən çe Statistika Komitə ım məlumatonku oşko vində bedə ki, orəxnə 2 sorədə məmləkəti daimi tərk kardəkəson miğdar 75% ziyod bıə. Bə dınyo omə korpon miğdar 10,4% saru eqıniə, vəfat kardəkəson isə 3,2% ziyod bıə. Tojə niqahon miğdar 4,6% kam, təloğon isə 14% vey bıə.

İm rəsmi rəğəmon Əliyev hokuməti bardə siyasəti məmləkəti iğtisadi-sosial vəziyyəti çanədə bə qıvoninə hol eğande oşko nişon dodə.