Az.R polis bə şəhrəvandon divon qətedə

Prezident İlham Əliyev daima ıştə qəponədə respublika polison həxədə tarifinə sıxanon votedə ki, ım təşkilat çe əhali əmniyyəti təmin və ğaydə-ğanunon muhafizə kardedə. Hətto bə Avropa numayəndon votışe ki, polison ıştənbəsə hərəkəton barədə votəyon həğiğət ni.

Əmo çoko respublika polisə ğıvvon bə şəhrıvandon divon qətedəbin, ısətən ıştə ım ğeyri-ğanuniə hərəkəti dəvom kardedən. Məmləkəti KİV -ədə bı barədə muntəzəm məlumaton dərc bedən. Meydan TV xəbə dodə ki, Ğusar rayoni polison meşəbəqi Səbuhi Abdullayev kuəşone. Əv ısət mərizxonədey. Mərizxonə sər doxtur Mubariz Təğiyevi bə Meydan TV muxbiri votəşe ki, Səbuhişon oktyabri 13-ədə bə mərizxonə vardə. Çey sədə və sıvvətədə qonə zədəon hestin. Mustəğilə jurnalist Cəmil Məmmədliən ıştə "Feyzbuk" səhifədə nıvıştedə ki, çimi bə navən polison meşəqədion kuəşone. Çimi əsəsə səbəb ıme ki, Ğusar rayoni polisə şebə rəisi bə Vişə fondi daxil bıə zəminədə ğeyri-ğanuni boştə villa dutəşe. Bə qorə Ekoloqiya Vəzarəti əvış 65 həzo mənot cərimə kardəşe. Həmonə rəisən de ğisas se məğsədi ıştə polison ekardəşe bə rayoni vişon bə ekoloqiya muhafizəçion divon qətedən.

"Azadlıq.info" saytən Şəki rayoni sakin Nicat Mirzəxanlı 4 nəfər polison tərəfo kue barədə nıvıştəşe. Nicat Mirzəxanlı oktyabri 14 şəvi de xeyli bədən xəsarəti diaqnozi bə mərizxonə vardəşone. Mirzəxanlı həmən çe "Reqion mediası" rujnomə jurnaliste. Ey bə "Azadi radio" votəşe ki, həmonə səvi bə Daxili Koon Vəziri "102" telefon xidməti polison bey divon qəte barədə məlumat doəşe. Çey maşkinə ruji qıley polisə leytenat ome ki, çeyku izahat bısəno, ıjən bino kardəşe ey təhğir karde.

Şəki Rayoni Prokuroturadə bə Radio muxbiri votəşone ki, de ım koy əlağədar təhğiğat bino kardəşone, Mirzəxanlışon dəvət kardə ki, bo, prokuroturadə izahat bıdo.