Az.R budcə nırəsəy çokne bə əməl omedə

Nati ğıyməti erjon be, mənoti devalıvasiya Az.R -ədə qıley iğtisadiə behrani bino noşe. Çə vaxtiku devlətə budcədə daima nırəsəy mevcude, Əliyevi hokumət budcə bə şəhrıvandon hisob pur karde ro daima bə sərt tədbiron dast ğandedə.

Azadi Radio çe iğtisadşunas-ekspert Ğubad İbadoğlu qıley təhlili barədə xəbə doəşe. İbadoğlu ıştə "Fasebook" səhifədə nıvıştəşe ki, 2015-minə sori Az.R budcə Devlətə Kemruqə Komitə bə məmləkət idxal bıə məhsulon bə hesabat kam daxil karde səbəbiku 1 milyard 300 milyon mənot vəsait qin kardəşe. Ey həmonə sori  10 qılə məmləkəti Xariciə Ticari təşkilaton bə Azərbaycan vığandə məhsulon dair məlumaton de Azərbaycani Kemruqə Komitə rəsmi məlumaton muğayisə kardəşe, çımədən jıqo qıley nəticə hasil bıə.

Məsələn, Turkiyə Xariciə Ticarətə təşkilati məlumatədə nişon doə bedə ki, 2015-minə sori Turkiyəku bə Az.R 1 milyard 900 milyon dollar məbləğədə məhsil vığandə bıə. Əmo Azərbaycani Kemruqədə ımşon 1 milyard 171 milyon dollar məbləğədə bə ğeyd sə. Yəni təğribən 30% məhsuli kemruqə verqi bə budcə daxil bıə ni, niyo kardəşone.  Çe İsrailiku 130 milyon dollar məbləğədə məhsul cəmi 25 milyon dollar bə ğeyd səşone, əmandənə 80% bə verqi cəlb bıə ni. Çe Belorusiya, Almaniya, Rusiya, Ğəzəxıstan, Yolə Britniya, İtaliya, Qurcistan, Macarıstaniku daxil bıə idxal məhsulon i hissə bə Kemriq Komitə hesabat daxil kardəşon ni. Çeyən umumi məbləğ 2 milyard dollarisən vey bıə.

Əliyevi hokumət budcə nırəsəy çe arə barde pidəşebu, bəpe budcə təşkil kardə devlətə təşkilat və muəssisonədə dələdızdə əməlon vəy bısəno, əyo ğaydə-ğanuni bə səhmon dəğando.